ئەمریکا فشار دەکات بۆ زوو دەستپێکردنەوەی هەناردەی نەوتی کوردستان

ئاڤا نیوز

سەرچاوەیەکی باڵا لە کۆمەڵەی کۆمپانیاکانی نەوتی کوردستان "ئەپیکۆر" بە ئاڤای ڕاگەیاند: لە هەموو کاتێک زیاتر نزیکبووینەتەوە لە ڕێککەوتن بۆ هەناردەکردنەوەی نەوت، ئەمریکاش لەوبارەیەوە فشارەکانی دەستپێکردووە. 

وێنە گەورەکە: ناکۆکیی سەرەکیی نێوان هەولێر و بەغدا لەسەر شێوازی هەناردەکردنی نەوت و دابینکردنی مووچەی فەرمانبەرانی کوردستانە، ئێستا گفتوگۆکان بەردەوامن بۆ گەیشتن بە ڕێککەوتنێکی بنەڕەتی بە ئامانجی چارەسەرێکی هەمیشەیی کە هەم هەناردەی نەوت دەستپێبکاتەوە و هەم ناردنی مووچە مسۆگەر بکرێت و مووچەی فەرمانبەران لە بەغداوە بنێردرێت.

زانیاریی تایبەت: سەرچاوەیەکی باڵا لە کۆمەڵەی کۆمپانیاکانی نەوتی کوردستان ئەپیکۆر بە ئاڤای ڕاگەیاند: هەرگیز وەکو ئێستا لە ڕێککەوتن بۆ هەناردەکردنەوەی نەوتی کوردستان نزیک نەبووینەتەوە، لەبەر دوو هۆکار؛ یەکەم بابەتەکە پەیوەست بووە بە مووچەی مووچەخۆرانی هەرێمی کوردستان، دووەم؛ لە ئەمریکاوە فشارێکی زۆر هەیە بۆ دەستپێکردنەوەی هەناردەی نەوت. 

تورکیا هیچ کێشەیەکی نییە بۆ دەستپێکردنەوەی نەوت، چونکە لە بەرژەوەندی ئەو وڵاتەیە و لە هەر بەرمیلێک نەوت چوار دۆلاری بۆ تورکیایە. 

زانیاریی زیاتر: چاوەڕوان دەکرێت ڕۆژی سێشەممە، هەموو ئەو ڕاپۆرتانەی لیژنەکان تەواویان کردووە، بخرێنە بەردەم سوودانی و لەسەر بنەمای ئەو ڕاپۆرتانە بڕیار لەسەر مووچەی مانگی شەش بدرێت. دوای مووچەی مانگی شەش ڕێککارەکان بۆ مووچەی مانگەکانی داهاتوو دەستپێدەکات.

لەلایەکی دیکەوە: سەرچاوەیەک لە وەزارەتی دارایی هەرێمی کوردستان بە ئاڤای ڕاگەیاند، بڕیارە لەم یەک دوو ڕۆژەدا، دوو شاند لە هەولێرەوە بچنە بەغدا، ئامانجی سەردانی ئەو شاندانەش ئەوەیە کە لەگەڵ شاندی وەزارەتی دارای عێراق لیژنەیەک پێکبهێنن بۆ پێداچوونەوە بە داهاتە نانەوتییەکانی هەرێمی کوردستان.