لە ڕاپەڕین شەش ڕاوچی دەستگیرکران و دەست بەسەر کەلوپەلەکانیاندا گیرا

ئاڤا نیوز

لە ئۆپەراسیۆنێکی هێزەکانی پۆلیسی دارستان و ژینگەی ڕاپەڕیندا، شەش ڕاوچی لە نزیک گوندەکانی دۆڵی شاورێ لە سنووری ناحیەی سەرکەپکان دەستگیرکران. ئەم ڕاوچیانە لە کاتی گەڕانەوەیاندا لە ڕاوکردنی باڵندەی کێوی بوون کە دەست بەسەر کەلوپەلەکانیاندا گیرا و ڕووبەڕووی یاسا کرانەوە.

لێدوانی فەرمی: شۆڕش کاکە فەتحوڵڵا، بەڕێوەبەری پۆلیسی دارستان و ژینگەی ڕاپەڕین، لە بە ئاڤای ڕاگەیاند: "ئەم شەش کەسە بەمەبەستی ڕاوکردنی باڵندەی کێوی چووبوونە ناوچەکە. لە کاتی گەڕانەوەیاندا، لەلایەن بازگەی ئاسایشی گوندی بۆتێوە دەستگیرکران و دواتر دۆسیەکەیان ڕادەستی ئێمە کرا."

زانیاریی زیاتر: بەڕێوەبەری پۆلیسی دارستان و ژینگە ئاماژەی بەوەشکرد کە لەگەڵ ڕاوچییەکاندا دەست بەسەر پێنج باڵندەی زیندوو، سێ قەفەزی باڵندە، یەک تۆڕ و سێ ماتۆرسکیلدا گیراوە. ووتیشی: "ئێستا ئەو شەش کەسە بەپێی ماددەی 42ـی یاسای پاراستن و چاککردنی ژینگە دەستبەسەرن و پەڕاوی لێکۆڵینەوەیان بۆ کراوەتەوە." ئەو باڵندانەی دەستیان بەسەردا گیراوە، ئازاد کراون و گەڕێندراونەتەوە بۆ ناو سروشتی کوردستان.

بەپێی وتەی بەڕێوەبەری پۆلیسی دارستان و ژینگەی ڕاپەڕین، دیاردەی ڕاوکردنی باڵندە و ئاژەڵە کێوییەکان بە بەراورد بە ساڵانی ڕابردوو کەمیکردووە، کە ئەمەش نیشانەی سەرکەوتنی هەوڵەکانیانە بۆ پاراستنی ژینگەی ناوچەکە.