بەهۆی کەمی ئاو و کارەبا لە ئێران پشووی فەرمی لە 10 پارێزگا ڕاگەیێنرا

ئاڤا نیوز

 

قەیرانی توندی کەمئاوی و پچڕانی کارەبا بۆ ماوەی چەندین کاتژمێر لە شارە جیاجیاکانی ئێران، حکومەتی ئەو وڵاتەی ناچار کردووە کە جگە لە ڕۆژانی پێنجشەممە و هەینی، ڕۆژانی شەممەش لە 10 پارێزگای وڵاتەکە بکاتە پشووی فەرمی.

چیرۆکی سەرەکی: بەپێی ڕاگەیێندراوی پارێزگارەکانی ئەو 10 شارە، ڕۆژی شەممە لە سەرجەم فەرمانگەکان، بە بانکەکانیشەوە، پشووی فەرمی دەبێت. ئامانج لەم بڕیارە کەم کردنەوەی بەکارهێنانی ئاو و کارەبایە لەلایەن دامەزراوە حکومییەکانەوە و کەم کردنەوەی فشارە لەسەر تۆڕەکانی دابەش کردنی ئاو  و کارەبا لە ئێران.

ئەوەی پێویستە بیزانیت: قەیرانەکە لە تارانی پایتەخت گەیشتووەتە ئاستێکی مەترسیدار، بەجۆرێک کە مەهدی چەمران، سەرۆکی ئەنجومەنی شاری تاران ڕایگەیاندووە، وەزیری وزە پێی وتوون کە "بەهۆی نەبوونی ئاوەوە، بۆ ماوەی دوو ساڵ نابێت هیچ بینایەک لە تاران دروست بکرێت" و داوای کردووە ڕەزامەندیی دروستکردنی باڵەخانە و خانوو ڕابگیرێت.

زانیاریی زیاتر: ئەو پارێزگایانەی کە پشووەکە دەیانگرێتەوە بریتین لە: ئەلبورز، تاران، خۆراسانی باکوور و باشوور، خوزستان، قوم، کرمان، یەزد و زۆربەی شارەکانی ڕۆژهەڵاتی کوردستان.