ئەمریکا بۆ سزادانی بەرپرسانی ئێران پێداچوونەوە بە یاسای ژینا ئەمینی دەکات

ئاڤا نیوز

 

دوای زیاتر لە حەوت مانگ لە پەسەندکردنی لەلایەن ئەنجوومەنی نوێنەرانەوە، لیژنەی پەیوەندییەکانی دەرەوەی ئەنجوومەنی پیرانی ئەمریکا ڕایگەیاند، لە ڕۆژی 16ـی نیسان یەکەم دانیشتن بۆ تاوتوێی پرۆژەیاسای ژینا ئەمینی دەکەن.

 

وێنە گەورەکە: ژینا ئەمینی کچێکی کوردی خەڵکی ڕۆژهەڵاتی کوردستان بوو، بەتۆمەتی پێشێلکردنی یاسای باڵاپۆشی لەلایەن پۆلیسی ڕەوشتی تارانەوە دەستگیرکرا، لە 16ـی ئەیلوولی 2022، بەهۆی ئەشکەنجەدان گیانی لەدەست دا. 

 

ئەوەی پێویستە بیزانیت: ڕەشنووسی یاسای ژینا ئەمینی پێشتر بە زۆرینەی ڕەهای ئەنجوومەنی نوێنەرانی ئەمریکا بە 410 دەنگی بەڵێ و سێ دەنگی نەخێر پەسەند کراوە، ئامانج لێی سزادانی بەرپرسانی باڵای ئێرانە، لەوانەش عەلی خامنەیی، ڕێبەری باڵا و ئیبراهیم ڕەئیسی سەرۆککۆماری ئێران. 

 

لەلایەکی دیکەوە: پرۆژەیاساکە داوا لە سەرۆکی ئەمریکا دەکات بە قەدەغەکردنی پێدانی ڤیزا بە عەلی خامنەیی و ئیبراهیم ڕەئیسی، هەر کەسێک بەشدار بێت لە بڕیاردان و پشتیوانیکردنی پێشێلکارییەکانی مافی مرۆڤ. هەروەها تێیدا هاتووە سەرۆکی ئەمریکا لە ماوەی هەر 90 ڕۆژ جارێک، بە وەرگرتنی ڕاپۆرتی پەیوەندیدار بە پێشێلکردنی مافەکانی مرۆڤەوە سزاکان بەسەریاندا بسەپێنێتەوە.

 

زانیاریی زیاتر: یاسای ژینا ئەمینی لە ئەیلوولی ساڵی ڕابردوو لەلایەن ئەنجوومەنی نوێنەرانی ئەمریکا، کە هاوکات لەگەڵ ساڵڕۆژی کوشتنەکەیدا بوو پەسەند کرا، بەڵام تاوتوێکردنی لە ئەنجوومەنی پیران دواخرا.