زیاتر لە 100 کەس بەهۆی خواردنی خراپبووەوە گەیێنراونەتە نەخۆشخانە

ئاڤا نیوز

لە دهۆک دەیان پیر و گەنج و منداڵ بەهۆی ژەهراویبوونیان بە خواردن دەگەیێنرێنە نەخۆشخانە، بەمەش خواردنگەیەک دادەخرێت و ڕێکاریی یاسایی بەرامبەر خاوەنەکەی دەگیرێتەبەر. 

چیرۆکی سەرەکی: شەوی دووشەممە لە هەردوو نەخۆشخانەکانی فریاکەوتن و هیڤی منداڵان لە شاری دهۆک، قەرەباڵغییەکی زۆر دروست بووە و خەڵکێکی زۆر بە لێشاو ڕوویان لەو دوو نەخۆشخانەیە کردووە، هۆکارەکەش ژەهراویبوونی ئەندامانی خێزانەکانیان بووە بەهۆی خواردنی خواردنگەیەک لە سەنتەری شارەکە.

لیدوانی فەرمی: مەتین جەمیل، بەرپرسی ڕاگەیاندنی تەندروستی گشتیی دهۆک بە زەید تەها، پەیامنێری ئاڤای ڕاگەیاند: ئەو کەسانەی لە منداڵ، گەنج و کەسانی بە تەمەن پێکهاتبوون، بەهۆی خواردنەوە ژەهراوی بوون و دەستبەجێ خراونەتە ژێرچاودێریی پزیشکییەوە، بەمەش حاڵەتەکانیان بە زوویی چارەسەر کراوە.

مەتین جەمیل دەشڵێت: سەرەتا 35 کەس گەیێنراونەتە نەخۆشخانەکان، بەڵام دواتر ژمارەکە بەرزبووەتەوە.

لەلایەکی دیکەوە: د.نزار بەکر، بەڕێوەبەری نەخۆشخانەی هیڤی مناڵان بە ئاڤای گوت: 8 منداڵ گەیێراونەتە نەخۆشخانەی هێڤی، حاڵەتەکانیان مەترسیدار نەبووە و لەلایەن پزیشکەکانەوە چارەسەر دەکرێن و دەنێردرێنەوە بۆ ماڵەوە.

گۆشەیەکی دیکەی دیمەنەکە: مللەت زکری، سەرۆکی لیژنەی بەدواداچوونی بازار لە قایمقامیەتی دهۆک بە ئاڤای وت: بە هەماهەنگی لەگەڵ لیژنەیەکی تایبەت لە بەڕێوەبەرایەتی گشتیی تەندروستیی دهۆک، سەردانی خواردنگەکەمان کردووە، دەرکەوت خواردنگەکە پاک نییە و خواردنی خراپبوو و ژەهراوی داوەتە خەڵک، بەمەش خواردنگەکە داخرا و  لێکۆڵینەوەی یاسایی لەگەل خاوەنەکەی دەکرێت.