گەنجێکی سۆران بە ڕووداوێکی نەخوازراو گیانلەدەست دەدات

ئاڤا نیوز

کارمەندێکی نەخۆشخانەی ئاشتیی بە ڕووداوێکی نەخوازراو گیانلەدەست دەدات، هاوکات مامۆستایەکی ئاینییش بەهۆیەوە دەستگیر دەکرێت.

چیرۆکی سەرەکی: شەوی پێنجشەممە، گەنجێکی ئیدارەی سەربەخۆی سۆران دوای ئەوەی هەست دەکات ئارەزووی خواردنی نەماوە و ئازارێک لە سکی دروستبووە، دەچێت بۆلای مامۆستایەکی ئاینیی سنوورەکە تاوەکو (ناوکی بۆ بهێنێتەوە)، بەڵام ئازارەکەی زیاتر دەبێت بەپەلە ڕەوانەی فریاکەوتنی خێرا دەکرێت. 

زانیاریی زیاتر: سەرباز ئەحمەد باڵەکی تەمەنی 25 ساڵ، خۆبەخشی نەخۆشخانەی ئاشتیی بووە لە ئیدارەی سەربەخۆی سۆران، شەوی ڕابردوو بەهۆی پچڕانی شاخوێنبەرێک لە سکیدا گیانلەدەست دەدات.

زانیاریی تایبەت: سەرچاوەیەک لە پزیشکی دادی سۆران لەوبارەیەوە بە ئاڤای ڕاگەیاند: ئەو کەسەی گیانیلەدەستداوە زەبرێک بەر سکی کەوتووە و بووەتە هۆی دروستبوونی خوێنبەربوونی ناوەکی و نەتوانراوە خوێنبەربوونەکە کۆنترۆڵ بکرێت.

زانیاریی بەدەستهاتوو: سەرچاوەیەکی ئاگادار بە ئاڤای ڕایگەیاند: سەرباز ئەحمەد دوای سەردانیکردنی ئەو مامۆستا ئاینییە گیانیلەدەستدا و ئێستا ئەو مامۆستایە لەلایەن پۆلیسی سۆرانەوە دەستگیرکراوە.