پسپۆڕانی ئابووری: سزاکانی ئەوروپا دژی ئێران کاریگەری گەورەی لەسەر عێراق دەبێت

ئاڤا نیوز

 

پسپۆڕانی ئابووری لە عێراق هۆشداری لە کاریگەریی سزاکانی یەکێتیی ئەوروپا دژی ئێران لەسەر عێراق دەدەن و پێشبینی دەکەن حکومەت و بانکی ناوەندی ڕووبەڕووی قەیرانێکی گەورە ببنەوە.

 

چیرۆکی سەرەکی: ڕۆژی پێنجشەممە، 28-11-2025، فەرەنسا، بەریتانیا و ئەڵمانیا، داوای دووبارە سەپاندنی سزاکانی نەتەوەیەکگرتووەکانیان لەسەر ئێران کرد، ئەمەش بەهۆی پابەندنەبوونی تاران بە بڕیارە نێودەوڵەتییەکان سەبارەت بە پرۆژە ئەتۆمییەکەی، ئەو سێ وڵاتە لە نامەیەکدا بۆ ئەنجوومەنی ئاسایش ئەمەیان ڕاگەیاند.

 

لێدوانی فەرمی: زیاد هاشمی، پسپۆڕی ئابووری ڕایگەیاند: سزاکانی سەر ئێران لەلایەن ئەوروپاوە لەوانەیە بەم زووانە بچنە بواری جێبەجێکردنەوە و بەو هۆیەشەوە ئابووریی ئێران تووشی قەیرانێکی تووند دەبێت.

 

کاریگەری و لێکەوتەکان: هاشمی ئاماژەی بەوەدا،  عێراقیش بەهۆی ئەو سزایانەوە کاریگەرییەکی بەهێز و ڕاستەوخۆی بەسەردا دێت، چونکە هاوردەکردنی غاز و کارەبای ئێران وەک جاران بۆ تۆڕی کارەبای عێراق بەردەست نابێت و لە ئەنجامدا ڕەنگە چەندین وێستگەی کارەبای عێراق بەتەواوی لەکار بکەون.

 

لەلایەکی دیکەوە: پسپۆڕانی ئابووری لە عێراق پێیانوایە، توندبوونی سزاکانی ئەوروپا لەسەر ئێران، جارێکی دیکە کشانەوەی دۆلار لە بازاڕی عێراقدا زیندوو دەکاتەوە، ئەمەش دەبێتە هۆی بەرزبوونەوەی نرخی دۆلار و ڕووبەڕووبونەوەی بانکی ناوەندی و حکومەتی عێراق لەبەردەم قەیرانێکی دارایی گەورەدا.