چوار پزیشکی بیانی لە هەولێر دەدرێنە دادگا

ئاڤا نیوز

 

لەچوارچێوەی سەردانی لیژنەی پشکنین و بەدواداچوونە تەندروستییەکان لە شاری هەولێر بۆ 37 کلینیک و سەنتەری پزیشکی ددان، وا بڕیارە چوار پزیشکی بیانی بدرێنە دادگە.

 

چیرۆکی سەرەکی: لە 37 کلینیکی هەولێردا دەست بەسەر زیاتر لە 800 پێداویستیی پزیشکیی ددانی ماوەبەسەرچوودا داگیراوە، لەو کلینیکانە سەرپێچییەکانی کارکردنی هاووڵاتیی سووری و پزیشکی بێمۆڵەت و کارکردنی قوتابی کۆلێژی ددان تۆمار کراون.

 

لێدوانی فەرمی: د.دلۆڤان محەممەد، بەڕێوەبەری گشتییی تەندروستیی هەولێر بە ئاڤای ڕاگەیاند: چوار دکتۆر کە خەڵکی سووریان بەبێ یەکسانکردنەوەی بڕوانامەی پزیشکی کاریان کردووە و ئەمەش پێچەوانەی ڕێنماییەکانی وەزارەتی تەندروستی بووە، دوای ئاگادارکردنەوەیان وازیان لەو کارە نەهێناوە و بەردەوام بوون لەسەری، بۆیە لیژنەکانمان بەدواداچوونیان بۆ کردوون و لە دادگا کەیسیان بۆ کراوەتەوە.

 

ژمارەکان وا دەڵێن: تەنیا دوێنێ شەممە 30-8-2025، لە هەولێر 12 کلینیکی ددان داخراون، 25 پزیشک پێبژاردنیان بۆ کراوە، 11 سەنتەر و کلینیکیش بەڵێننمامەیان پڕکردووەتەوە.