هەسەدە: سوپای سووریا ئاگربەست پێشێل دەکات هێرش دەکاتە سەر شاری کۆبانێ

ئاڤا نیوز

هەسەدە ئاشکرای دەکات، لە بەرەبەیانی ئەمڕۆوە سوپای عەرەبیی سووریا لە چەند بەرەیەکەوە هێرش دەکاتە سەر هەردوو شارۆچکەی خەراب عشک و چەلەبی لە باشووری ڕۆژهەڵاتی شاری کۆبانێ هاوکات تۆپبارانی ناوچەکانی دانیشتووان دەکات لە دەورووبەری هەردوو شارۆچکەکە.

چیرۆکی سەرەکی: سەرەڕای درێژکردنەوەی ئاگربەستی نێوان هەسەدە و دیمەشق، گرووپە چەکدارەکانی سەر بە سوپای عەرەبیی سووریا بەردەوامن لە پێشێلکارییەکانیان و ئەمڕۆ هێرشی چڕیان کردووەتە سەر دەوروبەری شاری کۆبانێ و هەسەدەش حکومەتی دیمەشق تۆمەتبار دەکات بە پێشێلکردنی ئاگربەست.

ڕاگەیێنراوی فەرمی: نووسینگەی ڕاگەیاندنی هەسەدە ڕایگەیاند: دوای ئەم هێرشانە پێکدادانی تووند لە نێوان هێزەکانمان و گرووپە هێرشبەرەکانی سەر بە سوپای عەرەبی سووریا سەریهەڵدا. هێزەکانمان بەردەوامن لە بەرپەرچدانەوەی هێرشەکە و پێکدادانەکان بەردەوامن بەتایبەتی لە شارۆچکەی چەلەبی، لەکاتێکدا گرووپەکان هێزی سەربازیی زیادە دەهێنن لەنێویاندا تانک و زرێپۆش، هاوکات فڕۆکە بێفڕۆکەوانەکانی تورکیا بەچڕی لە ئاسمانی ناوچەکە هاتووچۆ دەکات.

هەسەدە دووپاتی کردەوە، مافی خۆیانە بەرگری لە خۆیان بکەن و دیمەشق بە بەرپرسیار دەزانێت لە پێشێلکارییەکان و دەرئەنجامە مرۆیی و ئەمنییەکان، هاوکات داوا لەلایەنە گەرەنتیکارەکانی ڕێککەوتنی ئاگربەست دەکات بەرپرسیارێتیی خۆیان لە ئەستۆ بگرن و هەنگاوی خێرا بۆ ڕاگرتنی ئەم هێرشانە و کۆتاییهێنان بە پەرەسەندنی بەردەوامی دیمەشق بگرنەبەر.