هەوڵدەدرێت 150 هەزاری دەرماڵەی مامۆستایان زیاد بکرێت

ئاڤا نیوز

شاندێکی هەرێمی کوردستان بەمەبەستی زیادکردنی دەرماڵەی مامۆستایان لە بەغدایە و چاوەڕوان دەکرێت لە 150 هەزارەوە زیاتر بکرێت، لەگەڵ کۆمەڵێک ئیمتیازی دیکە. 

چیرۆکی سەرەکی: دووشەممەی ڕابردوو، پەرلەمانی عێراق، هەمواری یاسای یەکەمی ژمارە 22ی ساڵی 2011ی وەزارەتی پەروەردەی پەسەند کرد، ژمارەیەک ئیمتیازی لەخۆگرتووە، یەکێتیی مامۆستایانی کوردستانیش هەوڵ دەدات ئەو ئیمتیازانە مامۆستایانی هەرێمی کوردستانیش بگرێتەوە. 

لێدوانی فەرمی: ئەحمەد گەرمیانی، سەرۆکی یەکێتیی مامۆستایانی کوردستان کە بە سەرۆکایەتیی شاندێک سەردانی بەغدای کردووە، بە ئاڤای گوتووە: لە ڕێگەی سەندیکای مامۆستایانی عێراق و نوێنەرانی کورد لە بەغدا و لە کۆبوونەوە و دانوستانەکانی نێوان هەولێر و بەغدا، هەوڵ دەدەین ئەو ئیمتیازاتانە مامۆستایانی هەرێمی کوردستانیش بگرێتەوە.


زانیاریی زیاتر: بەپێی هەمواری یاسای پەروەردەی عێراق دەرماڵەی پیشەیی مامۆستایان لە 150 هەزار دینارەوە بۆ 300 هەزار دینار زیاد کراوە، هەموو مامۆستایەکیش کە دادەمەزرێت دەبێت سێ تا پێنج ساڵ لە ناوچە دوورە دەستەکان خزمەت بکات، ئەو ماوەیەش بۆ مەبەستی خانەنشینی بە دوو بەرامبەر هەژمار دەکرێت.