هەندێک لایەنی شیعە کارتی بەنزین "دژی سوودانی" بەکاردەهێنن

ئاڤا نیوز

هەندێک لە لایەنە سیاسییەکانی عێراق  هەوڵ دەدەن محەممەد شیاع سوودانی، سەرۆکوەزیرانی عێراق  بخەنە دۆخێکی شەرمەزارکەرەوە، بەهۆی بڕیاری حکومەت بۆ گرانکردنی نرخی بەنزین.

وێنە گەورەکە: لەسەر گرانکردنی نرخی بەنزین، لە پەرلەمانی عێراق واژۆ بۆ بانگهێشتکردنی محەمەد شیاع سوودانی و عەبدولغەنی حەییان، وەزیری نەوت بۆ پەرلەمان کۆکراوەتەوە.

هۆکارە زانراوەکان: بەگوتەی سەرچاوەیەک بۆ ڕۆژنامەی شەرقولئەسەت، نەیارەکانی سوودانی لەنێو لایەنە سیاسییەکانی شیعە نیگەرانن لە لەدەستدانی کورسییەکانیان لە هەڵبژاردانی داهاتووی پەرلەمانی عێراق، ترسیشیان هەیە لەوەی سوودانی هاوپەیمانیی سیاسی پێکبهێنێت.

ئەوەی پێویستە بیزانیت: گەڕانەوەی سەدر بۆ ناو پرۆسەی سیاسی لە بەرژەوەندی چوارچێوەی هەماهەنگی نابێت، بەڵام کاریگەری ناکاتە سەر سوودانی، بەو واتایەی سوودانی و سەدر لە هەڵبژاردنی داهاتووی پەرلەمان دەبنە گەورەترین لایەنی شیعەی براوەی هەڵبژاردن، لەبەرئەوەی کورسی لایەنەکانی ناو چوارچێوەی هەماهەنگی بۆ خۆیان دەبەن.

ئەوەی پێشبینی دەکرێت: بەگوتەی سەرچاوەکە، چوارچێوەی هەماهەنگی ڕێگە بە سیناریۆیەکی لەوشێوەیە نادات، بەهەموو شێوازەکان دەیەوێت سوودانی کۆت و بەند بکات، درێغیش ناکات لە بەکارهێنانی کارتی بەنزین بۆ ئەو مەبەستە، ڕەنگە شەپۆلی ناڕەزایەتییەکان دژی بڕیارەکەی سوودانی بۆ گرانکردنی بەنزین فراوان ببن.

باکگراوند: لە کۆبوونەوەی هەفتەی ڕابردووی ئەنجوومەنی وەزیرانی عێراق بڕیار درا نرخی بەنزین بەرزبکرێتەوە، لیترێک بەنزینی موحەسەن کرایە 850 دینار و لیترێک بەنزینی سوپەریش کرایە هەزار و  250 دینار، بڕیارەکەش لە یەکی ئایاری 2024 جێبەجێ دەکرێت.