مانگی ڕابردوو زیاتر لە 600 نەخۆش لە فریاکەوتنی ڕۆژئاوای هەولێر خەوێنراون

ئاڤا نیوز

لە مانگی هەشت زیاتر لە 18 هەزار نەخۆش سەردانی نەخۆشخانەی فریاکەوتنی ڕۆژئاوای هەولێریان کردووە و 644 کەسیان خەوێندراون.

وێنە گەورەکە: نەخۆشخانەی فریاکەوتنی ڕۆژئاوای هەولێر، لە 24 کاتژمێردا بە بەردەوامی پێشوازی لە هەر ڕووداوێکی نەخوازراو و نەخۆشییەکی کتوپڕ دەکات، بەمەش ڕۆژانە سەدان هاونیشتمانی ڕوو لە نەخۆشخانەکە دەکەن، بەشێکیان پێویستییان بە نەشتەرگەریی دەبێت و هەندێکیشیان لە نەخۆشخانەکە دەخەوێندرێن.

لێدوانی فەرمی: د. کاروان یاسین، بەڕێوەبەری نەخۆشخانەی فریاکەوتنی ڕۆژئاوای هەولێر بە ئاڤای ڕاگەیاند: لە مانگی ڕابردوو 18 هەزار و 597 نەخۆش سەردانی نەخۆشخانەکەیان کردووە، چوار هەزار و 621 کەس چووەتە فریاکەوتنی نەخۆشخانەکە، 11 هەزار 451 نەخۆش سەردانی بەشی ڕاوێژکاری بەیانیان و ئێوارانیان کردووە، هەزار و 115 نەشتەرگەری بچووک بۆ هاووڵاتیان کراوە.

ژمارەکان وا دەڵین: داتاکانی مانگی ڕابردووی نەخۆشخانەی فریاکەوتنی ڕۆژئاوا بەم شێوەیەن:

٠ 402 کەس نەشتەرگرییان بۆ کراوە.

٠ 644 نەخۆش زیاتر لە 24 کاتژمێر لە نەخۆشخانەکە ماونەتەوە و خوێندراون.

٠ 17 هەزار و 10 پشکنین لە تاقیگەی خوێن کراون.

٠ حەوت هەزار و 842 تیشک (ئێکس-ڕەی) بۆ هاووڵاتیان کراوە.

٠ هەزار و 947 سۆنار و 951 سیتی سکان کراون.