دادگەی فیدراڵی دادبینی بۆ کەیسی گەڕانەوەی ئاوارەکان لە هەرێمی کوردستان دەکات

ئاڤا نیوز

دادگەی فیدراڵی دادبینی بۆ کەیسی گەڕانەوەی ئاوارەکانی هەرێمی کوردستان دەکات، بەرپرسێکی وەزارەتی ناوخۆی کوردستانیش دەڵێت، ئەوان ڕێگرییان لە ئاوارەکان نەکردووە و کۆمەڵێک هۆکاری سەرەکی هەن بۆ مانەوەیان لە کەمپەکانی هەرێمی کوردستان.

وێنە گەورەکە: ئەمڕۆ یەکشەممە دادگەی باڵای فیدراڵی عێراق لەبارەی چوار پرس کۆدەبێتەوە و دوانیان پەیوەستن بە هەرێمی كوردستانەوە. یەکێک لەوان سکاڵایەکی وەزارەتی کۆچ و کۆچبەرانی عێراقە لەبارەی "ڕێگریکردن لە گەڕانەوەی ئاوارەکان" لە کەمپەکانەوە بۆ شارەکانی عێراق کە لەسەر هەرێمی کوردستان تۆماری کردووە و داوا دەکات تاوەکو مانگی تەمموزی ئەمساڵ سەرجەمیان بگەڕێنەوە.

 

لێدوانی فەرمی: عەلی سەعید، بەڕێوەبەری زانیاری و پەیوەندییەکان لە ناوەندی هەماهەنگی و قەیرانەکانی سەر بە وەزارەتی ناوخۆی هەرێمی کوردستان بە ئاڤا نیوزی گوت: ئێمە ڕێگریمان نەکردووە و بڕوامان بە گەڕانەوەی ئارەزوومەندانە و شکۆمەندانەی سەرجەم ئاوارە و پەنابەران ھەیە بۆ زێدی ڕەسەنی خۆیان".

 

هۆکارە زانراوەکان: بەپێی توێژینەوە و بەدواداچوونەکانی ناوەندی هەماهەنگی و قەیرانەکان، نەگەڕانەوەی ئاوارەکان دەگەڕێتەوە بۆ کۆمەڵێک هۆکاری ھەڵپەسێردراوی وەک؛ نەبوونی ئارامی و سەقامگیری، خزمەتگوزاری و دەرفەتی کارکردن، کێشە عەشائیری و یاساییەکان، بوونی گروووپی میلیشیایی چەکدار لە زێدی ڕەسەنی ئاوارەکان و جێبەجێنەکردنی ڕێککەوتنامەی شنگال.

 

لەلایەکی دیکەوە: بەگوێرەی دەستوور گەڕانەوی ئاوارەکان بە زۆرەملێ نابێت، ئاوارەکان لەبەر چەند هۆکارێک ئامادەنین بگەڕێنەوە، لەوانە؛ نائارامی ناوچەکانیان، حکومەتی عێراق پابەندی بەڵینەکانی نەبووە و ئاوارەکانی قەرەبوو نەکردووەتەوە، تاوەکو ئێستا لە کۆی نزیکەی 20 هەزار کەیسی قەرەبوو لە شنگال تەنیا 20 کەس قەرەبووکراونەتەوە. شێروان دووبەردانی، ئەندامی ئەنجوومەنی نوێنەرانی عێراق وای بە ئاڤا نیوز گوت.

ژمارەکان وادەڵێن: لە هەرێمی کوردستان زیاتر لە 902 هەزار ئاوارە و پەنابەر هەن، 630 هەزاریان ئاوارەی عێراقین و لە 20 کەمپی هەرێمی کوردستان  نیشتەجێن:

- 239 هەزار و 985 ئاوارە لە شەش کەمپی هەولێرن. 
- 131 هەزار و 624 ئاوارە لە دوو کەمپی  سلێمانین.
- 258 هەزار و 453 ئاوارە لە 15 کەمپی دهۆکن.