لە زیقار بۆ ڕووبەڕووبوونەوەی قەیرانی ئاو هەزار بیر لێدەدرێت

ئاڤا نیوز

حکومەتی خۆجێی زیقار دەستیکردووە بە داڕشتنی پلانێک بۆ چارەسەرکردنی قەیرانی وشکەساڵی لە ڕووباری غەراف لە باکووری پارێزگاکە، کە سەرچاوەی سەرەکی ئاوی شیرینی پارێزگاکە.

وێنە گەورەکە: عێراق یەکێکە لە زەرەرمەندترین وڵاتان لەڕووی گۆڕانی ئاو و هەواوە، بەو هۆیەوە ڕووبەڕووی قەیرانی کەمیی ئاو بووەتەوە، بەشێوەیەک کاریگەریی کردووەتە سەر بەرهەمی کشتوکاڵی و ماسی و جووتیاران بە تایبەتی لە چەند پارێزگایەک لەوانەش زیقار، دیوانییە و موسەننا.

لێدوانی فەرمی: ڕەزاق ئەلعەلی، یاریدەدەری پارێزگای زیقار بە ئاڤا میدیای ڕاگەیاند: "پلانی جێگرەوە بریتییە لە ڕاکێشانی ئاوی ڕووباری فورات بۆ  ڕووباری غەراف کە دەکەوێتە باشووری پارێزگاکە، لە ڕێگەی بۆرییەوە، ئەم بابەتە پەیوەستە بە ڕاپۆرتەکانی وەزارەتی ژینگە بۆ هەڵسەنگاندنی دۆخی ئاوی فورات و ئەگەری پشتبەستن پێی".

شێوازی جێبەجێکردن:  پلانەکە، لێدانی هەزار بیر لە باکووری پارێزگاکە لەخۆدەگرێت، بە مەرجێک ئاوەکان پاک بکرێنەوە بۆ ئەوەی گونجاو بن بۆ بەکارهێنان.

ئەوەی پێویستە بیزانیت: بەگوێرەی وەزارەتی کشتوکاڵی عێراق، لە ماوەی ڕابردوودا بەهۆی کەمیی ئاوەوە سەدان خێزان لە پارێزگای زیقار بە تایبەتی جووتیاران ئاوارەی پارێزگای نەجەف بوون.