ژمارەیەک پارک و باخچەی هەولێر نۆژەن دەکرێنەوە

ئاڤا نیوز

بەمەبەستی ڕێکخستنەوە و بایەخدانی زیاتر بە شاری هەولێر، ژمارەیەک پارک و باخچەی گەڕەکەکانی شارەکە نۆژەن دەکرێنەوە.

چیرۆکی سەرەکی: ئێوارەی ئەمڕۆ شەممە 2025-09-06، ئەندازیار کارزان عەبدولهادی، سەرۆکی شارەوانی هەولێر بە یاوەری بەڕێوەبەری ئەندازەی پارکەکان، سەرپەرشتیاری پلان، هونەری و سەرۆکی بەشی پلاندان، ژمارەیەک لە پارک و باخچەکانی گەڕەکەکانی شاری هەولێری بەسەرکردەوە.

لێدوانی فەرمی: ئەندازیار ڕێبین ئەحمەد، بەڕێوەبەری ئەندازەی پارکەکانی هەولێر بە ئاڤای ڕاگەیاند: لەڕێگەی پلانێکی ستراتیژییەوە کار لەسەر فراوانکردنی پارکەکان و دروستکردنی پارکی نوێ دەکەین، پلانەکە بەپێی بودجەی بەردەست کاریان تێدا دەکرێت و دەخرێنە خزمەتی هاووڵاتیانەوە.

زانیاریی زیاتر: بە گوتەی بەڕێوەبەری ئەندازەی پارکەکان، کار بۆ ڕێکخستنەوە و نۆژەنکردنەوەی ژمارەیەک پارک دەکرێت، کورسی، ڕووناکی و پێدوایستییەکانی دیکەیان دابین دەکرێت، لە هەندێک شوێنیشدا دار دەچێندرێت، ئەمەش بۆ ئەوەیە سیمایەکی جوانتر بە پارک و باخچەکانی هەولێر ببەخشرێت، تاوەکو ژینگەیەکی تەندروست بۆ دانیشتووانی گەڕەکەکانی شارەکە بڕەخسێنێت.