تووشبوانی تای خوێنبەربوون لە دهۆک نەخۆشخانەیان جێهشت

ئاڤا نیوز


هەردوو تووشبووی نەخۆشی تای خوێنبەربوون لە پارێزگای دهۆك، دوای وەرگرتنی چارەسەریی پێویست، لە نەخۆشییەكە چاكدەبنەوە و نەخۆشخانە جێدەهێڵن.

چیرۆكی سەرەكی: ڕۆژی 30ـی مانگی ڕابردوو، وەزارەتی تەندروستی حاڵەتێکی دیكەی تووشبوون بە نەخۆشی تای خوێنبەربوونی لە پارێزگای دهۆك تۆماركرد كە پیاوێکی دانیشتووی شارۆچكەی سیمێڵە و تەمەنی 43 ساڵە، تووشبووەكە پیشەی قەسابە و بەركەوتەی ئاژەڵی تووشبوە، پێشتریش حاڵەتێكی دیكەی تووشبوون لە پارێزگاكە تۆماركرابوو كە ئافرەتێكە و خوشكی ئەو ئافرەتەیە كە بەهۆی تای خوێنبەربوون گیانی لەدەستدا بوو، دوای ئەنجامدانی پشكنین بۆیان و هەبوونی نیشانەكان، دەركەوت تووشبوون.

لێدوانی فەرمی: مەتین جەمیل، بەرپرسی ڕاگەیاندنی بەڕێوەبەرایەتیی تەندروستیی دهۆك بە ئاڤای ڕاگەیاند، دوای چەند ڕۆژێك مانەوەیان لە نەخۆشخانە و وەرگرتنی چارەسەریی پێویست و چاودێریكردنی دۆخی تەندروستییان، هەردوو تووشبووەکەی تای خوێنبەربوون، نەخۆشییەكەیان تێپەڕاند و بە سەلامەتی نەخۆشخانەیان جێهێشتووە.

بەرپرسی ڕاگەیاندنی تەندروستیی دهۆك ئاماژەی بەوەشكرد، بەڕێوەبەرایەتیی تەندروستیی دهۆك، ستافێكی پزیشكیی تایبەتمەندی بۆ چاودێریكردنی دۆخی تەندروستیی تووشبووانی تای خوێنبەربوون داناوە و ئەو تیمە ماندوونەناسانە كاردەكەن بۆ بەرەنگاربوونەوەی ئەم دۆخە.

پەیوەست بەم بابەتە: تەندروستیی دهۆك بەهەماهەنگی لەگەڵ بەڕێوەبەرایەتیی ڤێتێرنەری، هەڵمەتێكی فراوانی ڕشاندنی ئاژەڵانی دەستپێكردووە بە مەبەستی خۆپاراستن لە تای خوێنبەربوون.

باکگراوند: تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە، نیشانەکانی نەخۆشییەکە بریتین لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست، بە نەخۆشییەكی كوشندە هەژماردەكرێت و تا ئێستا چەندین کەسیش بەو نەخۆشییە گیانیان لەدەستداوە.