لەبارەی هەڵبژاردنی کوردستانەوە پلاسخارت سه‌ردانی فایه‌ق زێدان دەکات

ئاڤا نیوز

 

بۆ گفتوگۆکردن لەبارەی پرۆسەی هەڵبژاردنی پەرلەمانی کوردستان و نیگەرانییەکانی پارتی و بەشێک لە لایەنەکان لە شێوازی هەڵبژاردن، پلاسخارت سەردانی سه‌رۆكی ئه‌نجوومه‌نی باڵای دادوه‌ریی عێراقی کرد.

 

بۆچی گرنگە؟ دوای ڕاگەیێنراوەکەی پارتی باڵیۆزخانەی ئەمریکا و یونامی، دەستیان بە هەوڵەکانیان کردووە بۆ جێبەجێکردنی تێبینی و مەرجەکانی پارتی لەبارەی هەڵبژاردن، لە هەوڵی بەردەوامیشدان بۆ ڕازیکردنی سەرۆک بارزانی بۆ بەشداریکردن لە هەڵبژاردن، بەپێی زانیارییەکانی ئاڤا نیوز لە کۆبوونەوەکەدا تاوتوێی ئەم بابەتە کراوە.

 

ڕاگەیێنراوی فەرمی: "جینین پلاسخارت، نوێنه‌ری ئه‌مینداری گشتیی نه‌ته‌وه‌ یه‌كگرتووه‌كان له‌ عێراق سه‌ردانی فایه‌ق زێدان، سه‌رۆكی ئه‌نجوومه‌نی باڵای دادوه‌ریی عێراقی كرد و باسیان له‌ ڕۆڵی دادوه‌ریی فیدراڵ له‌ هه‌ڵبژاردنی په‌رله‌مانی كوردستان کرد". ئه‌نجوومه‌نی دادوه‌ریی عێراق ڕایگەیاندووە.

 

ئەوەی پێویستە بیزانیت: ئەم کۆبوونەوەیە لەکاتێکدایە کە پارتی و بەشێک لە لایەنەکان نارەزایەتییان لەبارەی بڕیارەکانی دادگەی فیدراڵی و شێوازی ئەنجامدانی هەڵبژاردنی هەرێمی کوردستان هەیە.

 

ئەوەی ئێستا ڕوودەدات: سەرەڕای درێژکردنەوەی وادەکەی، بەڵام پارتی  و بەشێک لە لایەنەکان تاوەکو ئێستا لیستی بەربژێرەکانیان پێشکەشکی کۆمیسیۆن نەکردووە. 

 

لەلایەکی دیکەوە: دوێنێ باڵیۆزی ئەمریکا بۆ پرسی هەڵبژاردن لەگەڵ سەرۆک بارزانی، سەرۆکوەزیران بارزانی و نێچیرڤان بارزانی کۆبووەوە و جارێکی دیکە سەرۆک بارزانی خەختی کردەوە کە هەڵبژاردن بە دەستوەردانی نایاسایی و ئەجێندای دەرەکی و بەبێ بەشداریکردنی پێکهاتەکان ناکرێت.