تورکمانەکان پەکەکە بە کوشتنی سەرۆک عەشیرەتی بەیات تۆمەتبار دەکەن

ئاڤا نیوز

 

 

دوای ئەوەی لە هێرشێکی درۆنیدا لە کفری، کەسایەتیی تورکمان و سەرۆکی عەشیرەتی بەیات کوژرا، فراکسیۆنی تورکمانی لە پەرلەمانی عێراق پێیوایە هێرشەکە لەلایەن پەکەکەوە بە بەکارهێنانی فڕۆکەی بێفڕۆکەوان کراوە.

 

چیرۆکی سەرەکی: دوانیوەڕۆی ئەمڕۆ لە نزیک بازاڕی قەزای کفری بە درۆن هێرشکرایە سەر دیوەخانی حوسێن عەلووش، کەسایەتیی تورکمان و سەرۆک هۆزی بەیات، بەهۆیەوە گیانی لەدەستدا.

 

ڕاگەیێنراوی فەرمی: "چەکدارانی پەکەکە خوێنی هاووڵاتیانی مەدەنی تورکمانی عێراقی دەڕێژن، بەبێ هیچ وەڵامێکی حکومی و نێودەوڵەتی و ناوچەیی، بوونی ئەو چەکدارانە بووەتە مەترسی و هەڕەشەیەکی گەورە لەسەر نەخشەی سیاسی و پێکهاتەی کۆمەڵایەتی لە هەموو ناوچەکە". فراکسیۆنی تورکمانی لە پەرلەمانی عێراق ڕایگەیاندووە.

 

ئەمەش بزانە: دوای هێرشەکە بەرەی تورکمانی عێراقی وێڕای ئیدانەکردنی هێرشەکە پشتڕاستی کردەوە کە هێرشەکە لەڕێگەی فڕۆکەی بێفڕۆکەوانەوە کراوە.

 

زانیاریی زیاتر: تورکمانەکانی پەرلەمانی عێراق داوا لە سەرکردایەتیی یەکێتی دەکەن لە "پێویستی کاری جددی لە دەرکردنی ئەو چەکدارە نایاساییانەی کە خزمەت بە دۆزی نەتەوەیی کورد ناکەن"، سلێمانی نەکرێتە ئامانجی ئەم گرووپە چەکدارانە.

 

لەلایەکی دیکەوە: تاوەکو ئێستا هیچ ڕوونکردنەوەیەکی فەرمی لەلایەن دەزگا ئەمنییەکانەوە لەبارەی جۆری هێرشەکە و سەرچاوەکەیەوە نییە، جگە لەوەش پەکەکە و هیچ لایەنێک بەرپرسیارێتیی هێرشەکەیان لە ئەستۆ نەگرتووە.