کارگەی بەرهەمهێنانی ئۆکسجین لە نەخۆشخانەی ڕزگاریی هەولێر نۆژەن كرایەوە

ئاڤا نیوز

 

لە هەنگاوێکی گرنگدا بۆ بەرزکردنەوەی ئاستی خزمەتگوزارییە پزیشکییەکان، کارگەی بەرهەمهێنانی ئۆکسجین لە نەخۆشخانەی ڕزگاریی شاری هەولێر نۆژەنکرایەوە، ئەم پڕۆژەیە بەشێکە لە هەوڵەکانی حکومەتی هەرێمی کوردستان بۆ دابینکردنی خزمەتگوزاریی تەندروستیی باشتر بۆ هاووڵاتییان.

بۆچی گرنگە: کارگەی ئۆکسجین بەشێکی گرنگە لە نەخۆشخانە، بەتایبەتی بۆ ئەو نەخۆشانەی کە پێویستییان بە ئۆکسجینە لە کاتی نەشتەرگەری یان لە بەشەکانی چاودێریی چڕ و بەشەکانی دیکەی نەخۆشخانە. ڕۆژانە لە نەخۆشخانەی ڕزگاری لە نێوان 70 بۆ 100 نەشتەرگەری ئەنجام دەدرێت، کە هەموویان پێویستیان بە ئۆکسجینی بەردەوام هەیە.

لێدوانی فەرمی: د. لاوەند میران، بەڕێوەبەری نەخۆشخانەی ڕزگاری لە لێدوانێکیدا بۆ ئاڤا ڕایگەیاند: "ماوەی زیاتر لە شەش مانگ کارمان لەسەر نۆژەنکردنەوەی کارگەکە کردووە و تەواوی پێداویستییەکانی لە وڵاتی بەلجیکاوە هێنراون. ئێستا کارگەکە کوالێتییەکی زۆر پێشکەوتووی هەیە و بە بەردەوامی ئۆکسجین بۆ نەخۆش و چارەخوازان دابین دەکات." ئەم نوێکردنەوەیە دڵنیایی دەدات لە دابینکردنی ئۆکسجینێکی پاک و بە کوالێتی بۆ نەخۆشخانەکە.

 

ئەوەی پێویستە بیزانیت: نۆژەنکردنەوەی ئەم کارگەیە لەژێر چاودێری و بە سەرپەرشتی ڕاستەوخۆی نووسینگەی سەرۆکوەزیران مەسرور بارزانی ئەنجامدراوە. تێچووی پڕۆژەکە زیاتر لە 400 ملیۆن دینار بووە.