دوو نەخۆشخانەی 25 قەرەوێڵەیی لە سنووری سۆران دەکرێنەوە

ئاڤا نیوز

کارەکانی نەخۆشخانەی گشتیی سیدەکان و نەخۆشخانەی پیران لە قۆناغی کۆتاییداین، بڕیارە لە زووترین کاتدا تەواو بکرێن و بخرێنە خزمەت هاووڵاتیان.

چیرۆکی سەرەکی: بە مەبەستی پەرەپێدانی کەرتی تەندروستی لە ناوچەکە، دوو نەجۆشخانەی 25 قەرەوێڵەیی لە ئیدارەی سەربەخۆی سۆران دەکرێنەوە.

لێدوانی فەرمی: هەژار حەکیم، بەڕێوەبەری ڕاگەیاندن و پەیوەندییەکانی ئیدارەی سەربەخۆی سۆران بە ئاڤا میدیای ڕاگەیاند، پڕۆژەی دروستكردنی نەخۆشخانەی گشتی 25 قەرەوێڵەیی قەزای سیدەكان و  نەخۆشخانەی ناحیەی پیران لە ئیدارەی سەربەخۆی سۆران، یەكێكە لە پڕۆژە گرنگەكان لە كەرتی تەندروستی بۆ ناوچەکە، لە ئێستادا لە 97%ـی كارەكان تەواو كراون، ئەوەی ماوە دابینکردنی ئامێری پێویست و کارمەندی تەندروستییە.

لەلایەکی دیکەوە: دکتۆر دڵۆڤان محەممەد، بەڕێوەبەری گشتیی تەندروستی هەولێر، بە ئاڤا میدیای ڕاگەیاند، هەردوو نەخۆشخانەکە بیناکانی تەواو کراون و دەرخستەیان بۆ کراوە کە ئامێری پێویستییان بۆ دابین بکرێت، بڕیارە لە ماوەیەکی نزیک پێداویستییەکانییان بۆ دابین بکرێت و بخرێنە خزمەت هاووڵاتیان.

ئەوەی پێویستە بیزانیت: بە كردنەوەی نەخۆشخانەكان ئاستی بواری تەندروستی لە سنووری برادۆست و پیران دەچێتە قۆناغێكی باشتر.