لە سەرەتای ئەمساڵەوە پێنج هەزار ڤەیپ لە هەولێر دەستی بەسەرداگیراوە

ئاڤا نیوز

تیمەکانی بەڕێوەبەرایەتیی چاودێری بازرگانی هەولێر، لەماوەی هەشت مانگدا زیاتر لە 10 هەزار سەردانیان کردووە و 120 شوێنیان لەسەنتەری پارێزگاکە داخستووە، دەستیان بەسەر زیاتر لە پێنج هەزار ڤەیپدا گرتووە.

چیرۆکی سەرەکی:  لە سەرەتای ساڵی 2025ەوە تاکو 31ـی 8ـی 2025، تیمەکانی بەڕێوەبەرایەتیی چاودێری بازرگانی هەولێر لەگەڵ لیژنەکانی قائیمقامیەت و بەڕێوەبەرایەتیی پۆلیسی شارەوانی سەردانی 10 هەزار و 684 شوێنیان کردووە کە پێکهاتوون لە نانەواخانە، مۆڵ، عەلوە، گۆشت فرۆش، ئارایشتگا، خواردنگە، گۆشت فرۆش، سەوزە فرۆش، کۆگای جلوبەرگ، چەرەزات.

لێدوانی فەرمی: هۆگر عەلی، بەڕێوەبەری چاودێری بازرگانی هەولێر؛ بە ئاڤای گوت، "بەهۆی سەرپێچییەوە 120 شوێن داخراون و زیاتر لە  394 تۆن کەلوپەلی ماوە بەسەرچوو لەنێو براون، جگە لەوەی پێنج هەزار و 182 ڤەیپ دەستیبەسەردا گیراوە."

ئەمەش بزانە: ئەو کەسانەی سەرپێچی دەکەن، سزاکەیان لە 50 هەزارەوە دەستپێدەکات تا پێنج ملیۆن دینار هەڵدەکشێت، لەسەرەتای ئەمساڵەوە سەرپێچیکاران 286 ملیۆن و 228 هەزار دینار سزادراون.