پەڕاوی لێکۆڵینەوە بۆ 811 سەرپێچی ژینگەیی لە هەرێمی کوردستان کراوەتەوە

ئاڤا نیوز

پۆلیسی دارستان و ژینگە دەڵێت: ئەمساڵ دەیان باڵندە و ئاژەڵی کێوی لە ژینگەی سرووشتی خۆیان ئازاد کراون و 811 پەڕاوی لێکۆڵینەوە بۆ سەرپێچییە ژینگەییەکان کراونەتەوە.

وێنە گەورەکە: بەمەبەستی پاراستنی ژینگە و پارێزگاریکردن لە باڵندە و ئاژەڵە کێوییەکان، ڕاوکردن لە هەرێمی کوردستان بەیاسا قەدەغە کراوە، لەکاتی سەرپێچیکردنی ڕاوچییەکانیش، جیا لەوەی بەپێی یاسا و ڕێنماییەکانی ژینگەپارێزی سزا دەدرێن، ئاژەڵ و باڵندە ڕاوکراوەکانیش ئەگەر زیندووبن ئازاد دەکرێن.

لێدوانی فەرمی: ڕائید فوئاد ئەحمەد زراری، بەڕێوەبەری ڕاگەیاندن لە پۆلیسی دارستان و ژینگەی هەرێمی کوردستان بە ئاڤا میدیای گوت: بەردەوام تیمەکانمان لە ئەرکدان بۆ پاراستنی ژینگە و سرووشتی هەرێمی کوردستان و دەیان باڵندە و ئاژەڵی کێویشمان گەڕاندووەتەوە ژینگەی خۆیان.

ژمارەکان وادەڵێن: ئەمساڵ بەکۆیی سەرپێچییە ژینگەییەکان 811 پەڕاوی لێکۆڵینەوە کراوەتەوە و ڕێککاری یاسای جێبەجێکراوە، دوایین ئاماری ئازادکردنی ئاژەڵ و باڵندە کێوییەکان بەمشێوەیەیە:- "دوو ئاسک، 40 سمۆرە، دوو کەروێشک، 51 کەو، پێنج سوسکە، دوو هەڵۆ، دوو پۆڕ، 10 ئاژەڵی کێوی جۆراوجۆر، حەوت باڵندەی جۆراوجۆر".

ژمارەیەک چەک و کەلوپەلی ڕاوکردنیش دەستیان بەسەرداگیراوە وەک، "33 تاپڕ، 114 فیشەکی تاپڕ، 10 کڵاشینکۆف، 70 فیشەکی کڵاشینکۆف، یەک دەمانچە، شەش فیشەکی دەمانچە، نۆ تۆڕی باڵندە، هەشت شەداو، 33 قەفەس، 15 لایت، 66 داوی باڵندە، 13 چەقۆ".