وەزارەتی دارایی لیستی مووچەی مانگی نۆ ئامادە دەکات

ئاڤا نیوز

وەزارەتی دارایی و ئابووری یەکە ژمێریارییەکانی ئاگادارکردووەتەوە، کە سیستمی پەیڕۆڵ کراوەتەوە و دەتوانن لیستی مووچەی مانگی نۆ ئامادە بکەن و بینێرنە گەنجینەکان.

وێنە گەورەکە: هەفتەیەکە وەزارەتی دارایی و ئابووری هەرێمی کوردستان، لیستی مووچەی مانگی ئابی فەرمانبەران و مووچەخۆرانی هەرێمی کوردستان لەلایەن تیمی تەکنیکی وەزارەتی دارایی و ئابووری هەرێمی کوردستانەوە ڕادەستی فەرمانگەی ژمێریاری وەزارەتی دارایی حکومەتی فیدراڵ کردووە، ئێستا کار لەسەر ئامادەکردنی لیستی مانگی نۆ دەکرێت.      
زانیاریی تایبەت: بەڕێوەبەرایەتی گشتیی ژمێرکاری سەر بە وەزارەتی دارایی و ئابووری، یەکە ژمێریارییەکانی ئاگادارکردووەتەوە، کە لەمڕۆ دووشەممەوە دەتوانن دەستبکەن بە ئامادەکردنی لیستی مووچەی مانگی نۆی مووچەخۆران و بدرێتە گەنجینەکان.

لەلایەکی دیکەوە: کێشەکانی نێوان هەولێر و بەغدا لەسەر هەناردەکردنەوەی نەوت و داهاتی ناوخۆ تائێستا بە هەڵپەسێردراوی ماونەتەوە، بەوهۆیەوە هێشتا مووچەی مانگەکانی حەوت و هەشت لەلایەن بەغداوە نەنێردراوە، بۆ چارەسەرکردنی کێشەکانیش ئەنجوومەنی وەزیرانی عێراق نووسراوی فەرمی بۆ ئەنجوومەنی دەوڵەت کردووە و داوا دەکات ئەنجوومەنەکە ڕای یاسایی خۆی بخاتەڕوو.