زانیاریی نوێ لەبارەی نەوت و داهاتی ناوخۆ؛ دوو لەمپەرە گەورەکەی بەردەم پرسی مووچە

ئاڤا نیوز

ئەنجوومەنی دەوڵەت لەبارەی داهاتی ناوخۆی کوردستان کۆدەبێتەوە، بڕیارە بۆچوونی خۆی دەرببڕێت و ناکۆکییەکە لەنێوان هەولێر و بەغدا یەکلایی بکاتەوە. چاوەڕوان دەکرێت ئەنجوومەنی وەزیرانی عێراق بڕیارێکی یەکلاکەرەوە لەوبارەیەوە بدات. 

چیرۆکی سەرەکی: بەپێی زانیارییەکانی ئاڤا، سبەی سێشەممە کۆبوونەوەی ئەنجوومەنی دەوڵەت کاتژمێر نۆ دەستپێبکات، هاوکات دوو نوێنەری هەرێمی كوردستانیش لە کۆبوونەوەکەدا بەشدار دەبن بۆ بەرگریکردن لە بۆچوونەکانی هەرێمی کوردستان.

زانیاریی زیاتر: بابەتەكە لێكدانەوەی یاساییە بۆ ئەو ماددە یاساییانەی كە باس لە داهاتی نانەوتیی هەرێمی كوردستان دەكەن، هەولێر و بەغدا لەسەر پشکی حکومەتی عێراق كۆك نین.

ئەنجوومەنی دەوڵەت تەنیا بۆچوونی یاسایی خۆی دەڵێت و بڕیار نادات، ئیشی ئەنجوومەنەکە بڕیاردان نییە، پرسیاریان لێکراوە و وەڵامی یاسایی دەدەنەوە، بەڵام وەڵامەکەشیان بەهەند وەرگیراوە.

لێدوانی فەرمی: ڕێبوار هادی، سەرۆکی لیژنەی یاسایی پەرلەمانی  عێراق دەڵێت، ئەگەر ئەنجوومەنەكە ڕا و بۆچوونیش بخاتەڕوو پابەندكەر نابێت بۆ هەرێمی كوردستان.

لەلایەکی دیکەوە: سبەی ئەنجوومەنی وەزیرانی عێراق کاتژمێر یەک كۆدەبێتەوە، ئەگەر پێش كۆبوونەوەكە ئەنجوومەنی دەوڵەت بۆچوونەكەی خۆی بخاتەڕوو و وەڵامی نووسراوەكە بداتەوە، ئەنجوومەنی وەزیرانی عێراق تاوتووێی بۆچوونەكەی ئەنجوومەنی دەوڵەت دەكات، ئەگەر ئەمەش نەكرا پرسەکە یەکلانەکرایەوە یان وەڵامەکە پێڕانەگەیشت، ئەوا پرسەکە دەکەوێتە هەفتەی داهاتوو.

ئەمەش بزانە: لەبارەی هەناردەکردنەوەی نەوتی کوردستان کێشەکان تا ڕادەیەک چارەسەر کراون و هەولێر و بەغدا قۆناغی باشیان بڕیوە، ئەمڕۆ دووشەممە كەمال محەممەد، وەزیری سامانە سرووشتییەكان  بەوەكالەت لە كۆبوونەوەیەكی لەگەڵ كونسوڵی گشتیی چین باسی لەوەکردووە: کێشە و ئاستەنگەکانی بەردەم هەناردەکردنەوەی نەوتی هەرێمی کوردستان بەمنزیکانە چارەسەر دەكرێن.