مووچه‌ی مانگێکی سه‌دان فه‌رمانبه‌ر خه‌رج ده‌كرێت

ئاڤا نیوز

 

وەزارەتی دارایی و ئابووریی هەرێمی کوردستان لە هەوڵدایە بۆ چارەسەرکردنی کێشەی مووچەی ژمارەیەک لەو فەرمانبەرانەی کە لە ماوەی ڕابردوودا ڕاژەکانیان گواستووەتەوە و تا ئێستا مووچەی یەک مانگیان وەرنەگرتووە.

 

چیرۆکی سەرەکی: ژمارەیەکی زۆر لە فەرمانبەران، بەتایبەتی ئەوانەی لە مانگی تشرینی دووەمی ساڵی ڕابردوودا (11/2023) لە وەزارەتێکەوە بۆ وەزارەتێکی دیکە گواستراونەتەوە، بەهۆی دواکەوتنی مامەڵە کارگێڕییەکانیان و ناتەواوی لە سیستمی مووچەدا، تا ئێستا مووچەی مانگێکیان وەرنەگرتووە.

 

قووڵتر: بۆ نموونە، فەرمانبەرێک کە لە 15ی تشرینی دووەمی 2023 لە وەزارەتی پەروەردەوە گواستراوەتەوە بۆ وەزارەتی خوێندنی باڵا، بەهۆی درێژبوونەوەی ماوەی دەستبەکاربوونی لە شوێنە نوێیەکە، ناوەکەی لە لیستی مووچەی وەزارەتی پەروەردە سڕاوەتەوە و لە لیستی وەزارەتی خوێندنی باڵاشدا مووچەی بۆ خەرج نەکراوە. ئەمەش هاوکاتە لەگەڵ دواکەوتن و پاشان فەوتاونی مووچەی مانگی 12ی ساڵی ڕابردوو بۆ هەموو مووچەخۆران، بۆیە فەرمانبەرانی گواستراوە تا ئێستا مووچەی مانگی 11یان وەرنەگرتووە.

 

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای ڕاگەیاند، "داتای ورد لەسەر ژمارەی ئەو فەرمانبەرانە لەبەردەستدا نییە، بەڵام پێشبینی دەکرێت ژمارەکەیان زیاتر لە 500 کەس بێت".

 

وەزارەتی دارایی داوای لە سەرجەم وەزارەتەکان و دامودەزگا حکومییەکان کردووە کە ناوی فەرمانبەرانی گواستراوە و بڕی مووچە شایستەکانیان بۆ بنێرن، تاوەکو لەسەر داهاتی ناوخۆ مووچە دواکەوتووەکانیان بۆ خەرج بکرێت.