ئاڤای خەڵک؛ دوای بەدواداچوونی ئاڤا کارەکانی کارگەیەکی لم و چەو لە کەڵەک ڕاگیرا

ئاڤا نیوز

کارگەیەکی لم و چەو لەسەر زێی گەورە لە سنووری ناحیەی کەڵەکی سەر بە قەزای بەردەڕەش، کە ماوەی دوو هەفتە بوو دەستی بە کارکردن کردبوو، بە فەرمانی بەڕێوەبەرایەتیی ناحیە ڕاگیرا. هۆکاری ڕاگرتنەکە دەگەڕێتەوە بۆ نیگەرانییەکانی دانیشتووانی ناحیەکە و کاریگەریی نەرێنی کارگەکە لەسەر پیسبوونی ئاوی خواردنەوەی ناوچەکە.

زانیاریی بەدەستهاتوو: هاووڵاتیانی دانیشتووی کەڵەک بە ئاڤایان ڕاگەیاندبوو، کارگەکە تەنیا 100 مەتر لە پڕۆژەی ئاوی خواردنەوەی ناحیەکەوە دوورە. دوای دەستبەکاربوونی کارگەکە، ئاوی خواردنەوەیان زۆر پیس بووە و ڕەنگی گۆڕاوە،  هۆشدارییان دابوو لە ئەگەری تووشبوونی دەیان کەس بە نەخۆشی گورچیلە ئەگەر دۆخەکە بەردەوام بێت.

لێدوانی فەرمی: عەنتەر فەرهاد، بەڕێوەبەری ناحیەی کەڵەک، بە  ئاڤای ڕاگەیاند، هەرچەندە کارگەکە مۆڵەتی یەک ساڵ کارکردنی هەبووە، بەڵام بۆ دڵنیابوونەوە لە کاریگەرییەکانی لەسەر ئاوی خواردنەوە، لیژنەیەکیان لە نوێنەرانی بەڕێوەبەرایەتیی ناحیە و شارەوانی و فەرمانگەی ئاو ناردووەتە شوێنەکە.

بەڕێوەبەری ناحیە گوتی: "دوای پشکنین، بڕیارماندا بە ڕاگرتنی کارەکانی کارگەکە، چونکە کاریگەریی نەرێنی لەسەر ئاوی خواردنەوە دروست کردبوو. ئێستا کارەکانی ئەم کارگەیەمان ڕاگرتووە و بژاردەکانمان بریتین لە هەڵوەشاندنەوەی گرێبەستەکەیان یان گواستنەوەیان بۆ شوێنێکی دیکە."