كۆڕنیشی هەولێر دەكرێت بە پڕۆژەیەكی گەشتیاری

ئاڤا نیوز

قایمقامی هەولێر ئاشكرای دەكات كە كۆڕنیشی هەولێر لە داهاتوودا دەكرێت بە پڕۆژەیەكی گەشتیاری.

چیرۆكی سەرەكی: كۆڕنیشی هەولێر كە ڕێڕەوێكی ئاوییە و زیاتر بە وەرزی زستان ئاوی تێدا كۆدەبێتەوە و هۆكارێكە بۆ ڕێگەگرتن لە دروستبوونی لافاو، بەڵام بەهۆی مانەوەی ئاوەكە و تێكەڵبوونی بە ئاوەڕۆی بەشێك لە گەڕەكەكان و پاشماوەی ماڵان و خۆڵ خاشاك، بۆنێكی ناخۆش دروست دەبێت و بووەتە هۆی بێزاریی خەڵك، پلانی حكومەت ئەوەیە دیمەنەكە پێچەوانە بكاتەوە و بیكات بە پڕۆژەیەكی گەشتیاری.

لێدوانی فەرمی: نەبەز عەبدولحەمید، قایمقامی قەزای ناوەندی هەولێر بە ئاڤا میدیای ڕاگەیاند: لە پلانی حكومەتی هەرێمی كوردستاندایە كە كۆڕنیشی هەولێر، دوای پاككردنەوەی، ئاوی لێ كۆبكرێتەوە و بكرێت بە شوێنێك گەشتیاریی سەرنجڕاكێش، هاوكات پڕۆژەكە بە شێوەیەك دەبێت كە لەڕووی ژینگەییەوەش سوود بە ناوچەكە و دانیشتووانەكەی بگەیێنێت.

ئەوەی پێویستە بیزانیت: كۆڕنیشی هەولێر دەكەوێتە بەشی ڕۆژهەڵاتی شاری هەولێر و بە تەنیشت هەریەك لە گەڕەكەكانی 5ـی حەسارۆك و گەلاوێژ و فەرمانبەران و چەند گەڕەكێكی دیكەدا دەڕوا و ئاوی باراناو دەباتە دەرەوەی شار.