خۆڵبارین نزیکەی 80 کەسی لە سلێمانی و کەرکووک خستە نەخۆشخانە

ئاڤا نیوز

لە ئێوارەی ڕۆژی هەینییەوە خۆڵبارینێکی چڕ شارەکانی هەرێمی کوردستانی گرتووەتەوە، بەو هۆیەوە نزیکەی 80 کەس لە نەخۆشخانەکانی سلێمانی و کەرکووک چارەسەریان بۆ کراوە، بەشێکیان منداڵ بوون.

ڕاگەیێنراوی فەرمی: تەندروستی سلێمانی ڕایگەیاند، بە هۆی کاریگەری شەپۆلی خۆڵبارینەوە لە ئێوارەی ڕۆژی هەینییەوە تا کاتژمێر 11ـی شەو، 44 هاونیشتمانی سەردانی نەخۆشخانەکانیان کردووە بۆ چارەسەر، لەو ژمارەیە نۆ کەسیان لە نەخۆشخانە ماونەتەوە و ئەوانی تر دوای چارەسەرکردن نەخۆشخانەیان جێهێشتووە.

لەلایەکی دیکەوە: دیار محەممەد، پەیامنێری ئاڤا لە کەرکووک دەڵێت، ئاماری تەندروستی کەرکووک دەریدەخات تا ئێستا 39 کەس سەردانی نەخۆشخانەکانیان کردووە بۆ وەرگرتنی چارەسەر. لەو ژمارەیە 9 کەسیان منداڵ بوون.

ئەوەی پێویستە بیزانیت: بەگوێرەی زانیارییە کەشناسییەکان ئێوارەی ڕۆژی شەممە شەپۆلی خۆڵبارینەکە کۆتایی دێت.