مەسرور بارزانی لەبارەی ژینگە داوایەک لە خەڵکی دهۆک دەکات

ئاڤا نیوز

لە وتاری کردنەوەی پارکی سەرهەڵدان، مەسرور بارزانی، سەرۆکوەزیرانی کوردستان ڕایگەیاند، لە ماوەی ئەم دوو ڕۆژە ئەو دیاردەیەی بەرچاوی کەوتووە پیسکردنی ژینگەیە بە زبڵ و خاشاک لە قەراخ شەقامەکان و ناوچە گەشتیارییەکان. بۆیە داوا لە بەرپرسانی کارگێڕی دهۆک دەکات ئەوانەی ژینگە پیس دەکەن سزا بدرێن.

چیرۆکی سەرەکی: ڕۆژی شەممە، سەرۆکوەزیرانی کوردستان پارکی سەرهەڵدانی لە دهۆک کردەوە. پارکەکە لەسەر ڕووبەری 122 هەزار مەتر دووجا دروستکراوە. بڕیار بوو لەماوەی سێ ساڵ تەواو بکرێت، بەڵام بە کەمتر لە ساڵێک و سێ مانگ تەواو کرا.

لێدوانی فەرمی: مەسرور بارزانی، سەرۆکوەزیرانی کوردستان وتی، " لەم دوو ڕۆژە سەردانی زۆر شوێنی گەشتیارییم لە دهۆک کرد، وڵاتێکی ئێجگار جوانمان هەیە، بەڵام بەداخەوە ئەوەی وەک دیاردەیەکی ناشرین بەرچاوم کەوت فڕێدانی زبڵ و خاشاکە لەسەر شەقام کە ئەمە لەگەڵ کولتووری ئێمە ناگونجێ".

زانیاریی زیاتر: سەرۆکوەزیران داوا لە خەڵک دەکات ژینگەی وڵاتەکەمان بپارێزن، چونکە وڵاتی ئێمە ماڵی ئێمەیە. هاوکات داوا لە بەرپرسانی کارگێڕی ناوچەکە دەکات هەر کەسێک ژینگە پیس بکات پێویستە سزا بدرێت.