شاندێک بۆ چارەسەرکردنی کێشەی 27 هەزار پلەدار و خانەنشینی پێشمەرگە سەردانی بەغدا دەکات

ئاڤا نیوز

27 هەزار پلەدار و پێشمەرگەی خانەنشینکراو لە هەرێمی کوردستان، ماوەی چەند مانگێکە مووچەیان وەرنەگرتووە، بۆ چارەسەرکردنی کێشەکە بڕیارە ئەم هەفتەیە شاندێکی وەزارەتی پێشمەرگە سەردانی بەغدا بکات بۆ دۆزینەوەی میکانیزمێکی گونجاو بۆ یەکلاکردنەوەی ئەم پرسە.

چیرۆکی سەرەکی: لە کۆی 27 هەزار خانەنشین، دۆسیەی 22 هەزار خانەنشینی پێشمەرگە و کەمئەندام تەواو بووە، بەڵام چوار بۆ پێنج هەزار فایل ماون و کاریان لەسەر دەکرێت. هۆکاری سەرەکی دواکەوتنی مووچەکانیان لەسەر ئەوە وەستاوە کە بە کام یاسا خانەنشین بکرێن. وەزارەتی دارایی عێراق داوای کردووە بە یاسای خانەنشینی یەکگرتووی ساڵی 2014ـی عێراق خانەنشین بکرێن، لەکاتێکدا حکومەتی کوردستان داوا دەکات بە یاساکانی پەرلەمانی کوردستان خانەنشین بکرێن.

ئەگەر بە یاسای عێراق خانەنشین بکرێن، بڕوانامە و کۆمەڵێک ئیمتیازاتی پێشمەرگە و پلەدارەکان هەژمار ناکرێن، بەم هۆیەش مووچەکانیان کەمدەبێتەوە.

لێدوانی فەرمی: حاجی مەلا ئەمین، بەڕێوەبەری گشتیی خانەنشینی پێشمەرگە و کەمئەندامان، بە ئاڤای ڕاگەیاند، شاندەکەی وەزارەتی پێشمەرگە لەگەڵ دەستەی باڵای خانەنشینی عێراق کۆدەبێتەوە. ئەگەر بەغدا ڕازی نەبێت بە یاساکانی کوردستان خانەنشین بکرێن، ڕەزامەندی مەسرور بارزانی، سەرۆکوەزیرانی هەرێمی کوردستانیان وەرگرتووە کە مووچە و ئیمتیازاتی هیچ پلەدار و پێشمەرگەیەک کەم نەبێتەوە.

لەو بارەدا، حکومەتی هەرێم لەسەر داهاتی ناوخۆ، جیاوازیی مووچەیان بۆ خەرج دەکات، کە بە کۆی گشتی جیاوازییەکە مانگانە سێ ملیار دینار و نیو دەبێت. ئەمەش لە داهاتی ناوخۆی هەرێم دابین دەکرێت، بە واتایەکی دیکە، لە هیچ دۆخێکدا مووچەی خانەنشینانی پێشمەرگە کەم نابێتەوە و مافەکانیان پارێزراو دەبێت.