ڕێككەوتنی نەوت واژۆ دەكرێت؛ ئەنجوومەنی وەزیران بڕیار لە پرسی مووچە دەدات

ئاڤا نیوز

وتەبێژی حكومەتی هەرێمی كوردستان ئاشكرای دەكات، ئەمڕۆ دووشەممە ڕێككەوتنی سێقۆڵی بۆ هەناردەكردنەوەی نەوتی هەرێمی كوردستان واژۆ دەكرێت. سبەی سێشەممە، ئەنجوومەنی وەزیرانی عێراق بڕیار لەسەر پرسی مووچە دەدات.

وێنە گەورەکە: هەناردەکردنەوەی نەوت و داهاتی ناوخۆ، وەک دوو لەمپەر تائێستا لەبەردەم ڕێککەوتنی نێوان هەولێر و بەغدا مابوونەوە، هەناردەکردنەوەی نەوت بڕیاری کۆتایی لەبارەوە درا و ئەمڕۆ ڕێککەوتنەکە واژۆ دەکرێت، داهاتی ناوخۆش لەلایەن ئەنجوومەنی دەوڵەتەوە ڕای یاسایی لەسەر دراوە و سبەی ئەنجوومەنی وەزیرانی عێراق بڕیاری لەسەر پرسی مووچە دەدات.

ئەوەی پێویستە بیزانیت: ئاڤا پێشتر وەك یەكەم دەزگای میدیایی ئاشكرای كرد، کۆمپانیاکانی بەرهەمهێنانی نەوت لە هەرێمی کوردستان لەسەر پرسی دەستپێكردنەوەی هەناردەکردنی نەوتی هەرێمی كوردستان ڕازی بوونە، هاوكات پرۆپۆزەڵی ڕێککەوتنی نەوت لەنێوان عێراق و تورکیا بۆ هەناردەکردنەوەی نەوت لە ڕێگەی بەندەری جەیهانەوە تەواو بووە.

لێدوانی فەرمی: پێشەوا هەورامانی، وتەبێژی حكومەتی هەرێمی كوردستان لە لێدوانێكدا بۆ ئاڤا ڕایگەیاند، حكومەتی هەرێمی كوردستان، حكومەتی فیدراڵ و كۆمپانیاكانی بەرهەمهێنانی نەوت لەسەر پرسی نەوت گەیشتوونەتە ڕێككەوتن و ئەمڕۆ دووشەممە 22ـی ئەیلوول، گرێبەستی سێقۆڵی نێوانیان واژۆ دەكرێت.

هەنگاوی داهاتوو: بەگوتەی پێشەوا هەورامانی، بە واژۆكردنی گرێبەستە سێقۆڵییەكە، هیچ بەربەستێك لەبەردەم ناردنی مووچەی مووچەخۆرانی هەرێمی كوردستان نامێنێت و بەغدا دەبێت لە نزیكترین كاتدا مووچە ڕەوانە بكات.