ڕێڕەوەکانی ئاو و ئاوەڕۆکانی بنەسڵاوە پاکدەکرێنەوە

ئاڤا نیوز

لە سنووری قەزای بنەسڵاوە کار لەسەر کەمکردنەوەی مەترسییەکانی لافاو دەکرێت، بۆ ئەم مەبەستە ڕێڕەوەکانی ئاو و ئاوەڕۆکان پاکدەکرێنەوە.

وێنە گەورەکە: لەگەڵ نزیکبوونەوە لە وەرزی زستان، لە سنووری هەولێر و دەوروبەری دەستکراوە بە  پاککردنەوەی کەندە سرووشتییەکان و ڕێڕەوەکانی ئاو و ئاوەڕۆکان بە تایبەت لەو شوێنانەی مەترسی دروست بوونی لافاو یان کۆبوونەوەی ئاویان لێدەکرێت.

لێدوانی فەرمی: ئومێد خۆشناو پارێزگاری هەولێر بە ئاڤای گوت، بە ئامانجی کەمکردنەوەی مەترسییەکانی دروستبوونی لافاو و پێشگرتن لە کۆبوونەوەی ئاو لە وەرزی باران باریندا، دەستکرا بە پاککردنەوەى ڕێرەوەکانی ئاو و کردنەوەی ئاوەڕۆ و مەنهۆلەکان، لەسنووری قەزای بنەسڵاوە لەلایەن تیمەکانی شارەوانی.

لەلایکی دیکەوە: زریان سەباح، سەرۆکی شارەوانی بنەسڵاوە بە ئاڤای گوت: بەر لەهاتنی وەرزی باران بارین سەرجەم ڕێڕەوەکانی ئاو و مەنهۆل و ئاوەڕۆکان پاکدەکرێنەوە.

تیمی خزمەتگوزاریی سەرۆكایەتی شارەوانیی بنەسڵاوە بەهاوكاری بەرێوبەرایەتیی ئاودێریی هەولێر بەردەوامن لە خاوێنكردنەوەی سەرجەم ڕێڕەوەکانی ئاو لە سنووری قەزای بنەسڵاوە.

تیمەکان بەپێی ئەو ئەرکەی پێیان سپێردراوە دابەش کراون بەسەر سێ تیمی سەرەکی:

تیمی خاوێنكردنەوە كەندەكان و ڕێڕەوە سرووشتییەكان .

تیمی خاوێنكردنەوەی مەنهۆلەكان.

تیمی چاكردنەوەی ئاوەڕۆی گەڕەکەکان.

بۆچی گرنگە: پاککردنەوەی ئەو ڕێڕەوانەی ئاو و ئاوەڕۆکانی بنەسڵاوە کاریگەری ڕاستەوخۆی لەسەر کەمکردنەوەی مەترسی لافاو لە سنووری قەزاکە دەبێت، لەهەمان کاتیش کاریگەری لەسەر کەمکردنەوەی لافاو لەسەر هەولێریش دەبێت، چونکە ئاوی باران و ئاوەڕۆی بنەسڵاوە دەڕژێتە سەر کۆڕنیشی هەولێر.