بەهای تمەنی ئێران بەرامبەر دۆلاری ئەمریکی زیاتر دابەزی

ئاڤا نیوز

بەهۆی چالاکبوونەوەی سزاکانی سەر ئێران لەلایەن نەتەوەیەکگرتووەکانەوە، بەهای تمەنی ئێرانی شۆکێکی دیکەی بەخۆیەوە بینی و بەرامبەر دۆلاری ئەمریکی زیاتر دابەزی. 

وێنە گەورەکە: وەزیرانی دەرەوەی ئەڵمانیا، فەرەنسا و بەریتانیا لە بەیاننامەیەکی هاوبەشدا ئاشكرایان کرد سەر لە بەیانی ئەمڕۆ یەکشەممە سزاکانی نەتەوەیەکگرتووەکان بۆ سەر ئێران کارا کرایەوە. ئەوان دەشڵێن، دووبارە سەپاندنەوەی سزاکانی نەتەوەیەکگرتووەکان کۆتایی دیپلۆماسی نییە پێویستە لەگەڵ هەموو لایەنەکان کاربکەین بۆ گەیشتن بە چارەسەرێکی دیپلۆماسی نوێ بە مەبەستی دڵنیابوون لەوەی ئێران هەرگیز چەکی ئەتۆمی بەدەست نەهێنێت، هاوکات سوورن لەسەر جێبەجێکردنی خێرای ئەو سنووردارکردنانەی کە دووبارە سەپێنراونەتەوە و داواش لە هەموو وڵاتانی ئەندامی نەتەوە یەکگرتووەکان کرد ئەو سزایانە جێبەجێ بکەن.

لێدوانی فەرمی: کەیفی خۆشناو، گوتەبێژی ئەنجوومەنی بازاڕی ئاڵوگۆڕی دراوی هەولێر بە ئاڤا میدیای گوت: دوای بڕیاری سەپاندنەوەی سزاکانی سەر ئێران، بەهای تمەن لە بازاڕەکانی هەرێمی کوردستان ڕووی لە دابەزین کردووە، بەهۆی ئەمەوە چاوەڕوان دەکرێت بەهای تمەن زیاتریش دابەزێت. 

زانیاریی زیاتر: ئێستا بەهای تمەن لە بازاڕەکانی کوردستان بەمشێوەی خوارەوەیەوە: ڕۆژە پێنجشەممەی ڕابردوو 25-9-2025 نۆ ملیۆن و 800 هەزار تمەن بەرامبەر بە 100 دۆلاری ئەمریکی بوو. ئەمڕۆ بەهای تمەن گۆڕانکاری بەسەرداهات و  100 دۆلار گەیشتە 10 ملیۆن دینار بە کاش و 11 ملیۆن دینارە بە حەواڵە.

لە سلێمانی 100 دۆلار بەرامبەر 10 ملیۆن و 500 هەزار دینار بە کاش و  12 ملیۆن دینار بە حەواڵە.