حکومەتی عێراق "ستراتیژێکی گشتگیری نیشتمانی" بۆ مامەڵەکردن لەگەڵ نەخۆشانی ئۆتیزم دادەنێت

ئاڤا نیوز

ئەحمەد ئەسەدی، وەزیری کار و کاروباری کۆمەڵایەتی عێراق جەختی لەوە کردەوە، بەرەنگاربوونەوەی نەخۆشی ئۆتیزم ئەرکێکە پێویستی بە هەوڵی هاوبەشی هەموو دامودەزگاکانی دەوڵەت هەیە، ئەوەشی ئاشکرا کرد، حکومەت بڕیاریداوە ستراتیژێکی نیشتمانیی گشتگیر بۆ چارەسەرکردنی ئەم ئاڵنگارییە گەشەسەندووە دابڕێژێت.

ڕاگەیێنراوی فەرمی: ئەحمەد ئەسەدی ڕایگەیاند: بەرپرسیارێتی مامەڵەکردن لەگەڵ ئۆتیزمدا ناکەوێتە ئەستۆی یەک وەزارەت، بەڵکو پێویستی بە هاوکاریی چەندین وەزارەت هەیە، دیارترینیان وەزارەتی تەندروستی، چونکە بەرپرسیارە لە چاودێری پزیشکی.

ناوبراو وتیشی: "منداڵێک کە ئۆتیزمی هەیە هەرگیز بە تەواوی چاک نابێتەوە، بەڵام ئەگەر چاودێری پیشەیی تایبەتمەند وەربگرێت، دۆخەکەی باشتر دەبێت".

شێوازی جێبەجێکردن: بڕیارە لیژنەیەکی ناوەندی بۆ هەڵسەنگاندنی پەیمانگا و دامەزراوە تایبەتمەندەکانی ئۆتیزم پێکبهێنرێت، هەروەها ناوەندی پسپۆڕیی عێراقی بۆ ئۆتیزم دەکرێتە ناوەندێکی نموونەیی و ڕاستەوخۆ بە ئەمینداریەتی گشتی ئەنجوومەنی وەزیرانەوە گرێ دەدەرێت، هەروەها بەشداریکردنی وەزارەتەکانی تەندروستی و پەروەردە لە بەرنامەکانی دەستنیشانکردن و هۆشیاریدا.

وەزارەتەکە فۆرم و پێوەری فەرمی بۆ کردنەوەی ناوەند و پەیمانگای تایبەت دادەنێت و لەمەودوا، ڕێگە نادرێت هیچ لایەنێکی بیانی نمونەی کلینیکی لە منداڵانی ئۆتیزم وەربگرێت.

ژمارەکان وا دەڵێن: وەزارەتەکە لە ئێستادا 25 ناوەند و پەیمانگا پەیوەست بە نەخۆشیی ئۆتیزم بەڕێوەدەبات، لەنێویاندا ناوەندی بەغدا بۆ چارەسەری ئۆتیزم کە 47 سودمەندی هەیە، ئەمە جگە لە سەنتەرەکانی دیکەی نەجەف و ڕومادی.