دۆسیەی نزیكەی 18 هەزار خانەنشینی پێشمەرگە گواستراوەتەوە سەر وەزارەتی دارایی

ئاڤا نیوز

لەماوەی پێنج ساڵی تەمەنی كابینەی نۆیەمدا، دۆسیەی 17 هەزار و 805 خانەنشینی پێشمەرگە لەسەر میلاكی وەزارەتی پێشمەرگەوە گواستراونەتەوە سەر میلاكی بەڕێوەبەرایەتیی گشتیی خانەنشینی لە وەزارەتی دارایی و ئابووری، ئێستا مووچەی خانەنشینی بە هاوتاكراوی وەردەگرن.

چیرۆکی سەرەکی: لەچوارچێوەی هەوڵەكانی كابینەی نۆیەمی حكومەتی هەرێمی كوردستان بۆ پاكسازی و چاكسازی و بنبڕكردنی دوومووچەیی و مووچەی خانەنشینی نایاسایی، پاڵپشت بە یاسای ژمارە (2)ـی ساڵی 2020 یاسای چاکسازی لە مووچە و دەرماڵە و بەخشین و ئیمتیازاتەکان و خانەنشینی لە هەرێمی کوردستان، بڕیاردرا سەرجەم دۆسیەی خانەنشینانی سەربازی لە وەزارەتی پێشمەرگەوە بۆ وەزارەتی دارایی و ئابووری بگوازرێتەوە.

زانیاریی بەدەستهاتوو: بەپێی نووسراوی داتای چاكسازییەكانی كابینەی نۆیەمی حكومەتی هەرێمی كوردستان كە وێنەیەكی دەست ئاڤا میدیا كەوتووە، دۆسیەی 17 هەزار و 805 خانەنشینی سەربازی سەر بە وەزارەتی پێشمەرگە، كە پێشتر مووچەكانیان لەسەر بەڕێوەبەرایەتیی خانەنشینی و كەمئەندامان وەردەگرت، گواستراونەتەوە سەر میلاكی بەڕێوەبەرایەتیی گشتیی خانەنشینی لە وه‌زارەتی دارایی و ئابووری.

هاوكات هەردوو هەژماری یەكەكانی 70 و 80 هەڵوەشاونەتەوە و هەردوو هەژمارەكە لەژێر ناوی یەك هەژمار، بە ناوی هەژماری پێشمەرگە خراونەتە سەر وەزارەتی دارایی و ئابووریی هەرێمی كوردستان، ئەو هەنگاوەش پرۆسەی یەکخستنەوەی ھێزەکانی پێشمەرگە خێراتر دەکات.

زانیاریی تایبەت: هەر بەپێی نووسراوەكە، چوار هەزار و 189 كەس كە بە نایاسایی دوومووچەیان وەردەگرت، مووچەكانیان بڕدراوە و لێكۆڵینەوەش لە دۆسیەكانیان بەردەوامە.