دوای سێ مانگ لە وەستانی.. نەوتی کەرکووک بە تەنکەر ڕەوانەی ئوردن دەکرێتەوە

ئاڤا نیوز

 

دوای وەستانی بۆ ماوەی سێ مانگ، بڕیارە سەرەتای مانگی داهاتوو هەناردەی نەوتی کەرکووک بۆ ئوردن دەستپێبکاتەوە و ڕۆژانە 10 هەزار بەرمیل نەوت لە کێڵگە نەوتییەکانی کەرکووکەوە ڕەوانەی پاڵاوگەی ئەلزەرقای ناوەڕاستی ئوردن دەکرێت.

ئەوەی پێویستە بیزانیت: لە ئەیلولی ساڵی 2021ەوە عێراق و ئوردن ڕێککەوتن لەسەر ڕەوانەکردنی ڕۆژانە 10 هەزار بەرمیل نەوتی عێراق بۆ ئوردن بە نرخی 16 دۆلار کەمتر لە نرخی نەوتی برێنت (واتە بەنرخی ئەمڕۆ کە بەرمیلێک نەوت بە 68 دۆلارە، بە ئوردن بە 52 دۆلار دەفرۆشرێت)، لە بەرامبەریشدا ئوردن خەرجی گواستنەوەی نەوتەکە لە ئەستۆ دەگرێت کە بە ڕێگەی تەنکەرەوە ڕەوانە دەکرێت.

زانیاریی بەدەستهاتوو: سەرچاوەیەک لە کۆمپانیای نەوتی باکوور بە ئاڤا میدیای ڕاگەیاند، لە سەرەتای مانگی داهاتووەوە لە کێڵگە نەوتییەکانی کەرکووکەوە نەوت بە تەنکەر ڕەوانەی ئوردن دەکرێتەوە، ڕێککەوتنی عێراق و ئوردنیش هەموو سێ مانگ جارێک بەسەر دەچێت و پێویست دەکات نوێ بکرێتەوە.

 
لەلایەکی دیکەوە: دوێنێش وەزارەتی وزە و سەرچاوە سروشتییەکانی ئوردن بڵاویکردەوە، ساڵح خرابشە وەزیری وزە و سەرچاوە سروشتییەکانی ئوردن لە بەغدا لەگەڵ حەیان عەبدولغەنی، وەزیری نەوتی عێراق کۆبووەتەوە و گفتوگۆیان لەسەر ڕێککەوتنی نوێی هەناردەی نەوتی عێراق بۆ ئوردن کردووە، کە سەرەتای مانگی نۆ بۆ سێ مانگی دیکە درێژکراوەتەوە.