هۆشداری لەبارەی جۆرێکی ئاوی بوتڵی ئێرانی دەدرێت؛ ژەهراوییە و بووەتە هۆی مردن

ئاڤا نیوز

هۆشدارییەکی بەپەلە ئاراستەی هاووڵاتییان و بەتایبەتی دانیشتوانی ڕۆژهەڵاتی کوردستان دەکرێت سەبارەت بە بەکارهێنانی ئاوی بوتڵی بەرهەمی کۆمپانیای "ئۆرانۆس ستار"ـی ئێرانی. بەپێی زانیارییەکان، ئەم ئاوە ژەهراوییە و لە چەند وڵاتێکی کەنداو بووەتە هۆی گیانلەدەستدانی چەندین کەس.

زانیاریی بەدەستهاتوو: سەرچاوەکان باس لەوە دەکەن، دەسەڵاتدارانی وڵاتی عومان و وڵاتانی دیکەی کەنداو هۆشداری تووندیان لەسەر ئەم ئاوە بڵاوکردووەتەوە و داوایان کردووە کە بە هیچ شێوەیەک بەکارنەهێنرێت و هەر کەسێک ئەم بەرهەمەی لە ماڵدا هەبێت، دەستبەجێ فڕێی بدات.

چی ڕوویدا: لە عومان، خێزانێکی عومانی و ژنێکی بیانی دوای خواردنەوەی ئەم ئاوە، تووشی ژەهراویبوون بوون و سەرەڕای گەیاندنیان بە نەخۆشخانە، گیانیان لەدەستداوە. دوای لێکۆڵینەوەی پۆلیس، دەرکەوتووە کە هۆکاری مردنەکەیان خواردنەوەی ئەو ئاوە ژەهراوییە بووە کە لە مارکێتێک کڕیویانە و بەرهەمی "ئۆرانۆس ستار"ـی ئێرانی بووە.

ناوەندی سەلامەتی و کوالێتی خۆراکی عومان بە خێرایی هۆشداری و ئاگاداری بڵاوکردووەتەوە و داوا لە هاووڵاتیان دەکات، هەر کەسێک ئەو ئاوەی لە ماڵدا هەیە، دەستبەجێ فڕێی بدات و هیچ بەرهەمێکی "ئۆرانۆس ستار" بەکارنەهێنرێت. هۆکاری ئەم هۆشدارییەش بۆ ئەوە دەگەڕێتەوە کە بەرهەمەکانیان بە ماددە زیانبەخشەکان پیس بوون.