لە کۆریای باشوور هەزاران کەس ماڵئاوایی لە پاندایەک دەکەن

ئاڤا نیوز

 

لە کۆریای باشوور، نزیکەی 6 هەزار کەس لە ڕێوڕەسمی ماڵئاوایی لە پاندایەکدا بەشدار بوون. 

 

چیرۆکی سەرەکی: فو باو ناوی یەکەمین پاندای گەورەیە کە لە کۆریای باشوور لەدایک بووبێت، ئای باو و لی باو، دایک و باوکی ئەم پاندایەن، ساڵی 2016 لەلایەن شی جینپینگی سەرۆکی چینەوە بە دیاری پێشکەش بەو وڵاتە کران و بڕیارە تاوەکو ساڵی 2031 لەو وڵاتە بمێننەوە، بەڵام فو باو بە ئۆتۆمۆبێلێکی پێشکەوتووی تایبەتی دژە لەرزە بۆ فڕۆکەخانە و لەوێشەوە بۆ چین گوێزرایەوە.

 

زانیاریی زیاتر: فو باو، کە ناوەکەی بە واتای "گەنجینەی بەختەوەری" دێت، ساڵی 2020 لەدایک بووە. ڤیدیۆی کاتی لەدایکبوونی 500 ملیۆن بینەری لە یوتیوب هەبووە. لەو کاتەوە لە باخچەی ئاژەڵان 5.5 ملیۆن کەس، واتە نزیکەی 10%ـی کۆی دانیشتووانی کۆریای باشوور، سەردانیان کردووە. 

 

ئەوەی پێویستە بیزانیت: چین 'دیپلۆماسیی پاندا' وەک بەشێک لە هێزی نەرمی خۆی بەکار دەهێنێت و لە چوارچێوەی پڕۆگرامی زیادکردنی پانداکاندا، پاندا بە قەرز دەداتە باخچەی ئاژەڵانی وڵاتان و پێویستە لەدوای چەند ساڵێکی کەم بەچکەکانی ئەم پاندایانە بۆ چین بگەڕێنرێنەوە.