وەزارەتی سامانە سرووشتییەکان: وەستانی نەوتی کوردستان بەهۆی چەند کێشەیەکی تەکنیکی بوو

ئاڤا نیوز

دوای ئەوەی ئەمڕۆ هەینی هەناردەکردنی نەوتی کوردستان بۆ بەندەری جەیهان بەشێوەیەکی کاتی وەستا، وەزارەتی سامانە سرووشتییەکان لە ڕوونکردنەوەیەکدا دەڵێت، "هۆکاری وەستانەکە چەند کێشەیەکی تەکنیکی بووە".

وێنە گەورەکە: زیاتر لە دوو ساڵ بوو بەهۆی سکاڵایەکی وەزارەتی نەوتی عێراق هەناردەی نەوتی کوردستان بۆ بازاڕەکانی جیهان وەستا بوو، بەڵام دوای زیاتر لە 30 دانیشتن لە نێوان وەزارەتی سامانە سرووشتییەکان و وەزارەتی نەوتی عێراق سەرەنجام کاتژمێر حەوتی بەیانی ڕۆژی 2025-09-27 نەوتی هەرێمی کوردستان جارێکی دیکە هەناردەی بازاڕەکانی جیهان کرایەوە.

ڕاگەیێنراوی فەرمی: لە ڕاگەیێنراوێکدا لەبارەی وەستانی هەناردەی نەوتی کوردستان، وەزارەتی سامانە سرووشتییەکان دەڵێت "ئەمڕۆ رێکكەوتی 3ـی تشرینی یەكەمی 2025 بەهۆی دروستبوونی چەند كێشەیەكی تەكنیكی لە بەندەری جەیهانی توركی، هەناردەكردنی نەوتی هەرێمی كوردستان بۆ بەندەرەكە ڕاوەستا. لەكاتی ئێستادا ئەم كێشانە بەتەواویی چارەسەركراون و هەناردەكردنی نەوتی هەرێمی كوردستان دووبارە دەستی پێكردەوەو بەردەوامە."

ئەوەی پێویستە بیزانیت: نەوتی هەرێمی کوردستان لە کێڵگەی نەوتی خورمەڵەی نزیک هەولێر بە بۆری هەناردە دەکرێت و زیاتر لە 900 کیلۆمەتر دەبڕێت تا دەگاتە بەندەری جەیهان و لەوێشەوە دەخرێتە ناو عەمبارەکانی کۆمپانیای سۆمۆ.