نزیكەی 90%ـی فەرمانبەرانی سلێمانی خۆیان لە پرۆژەی هەژماری من تۆماركردووە

ئاڤا نیوز

سەرچاوەیەك لە تیمی هەژماری من بە ئاڤای ڕاگەیاند، نزیكەی 90%ـی فەرمانبەرانی مەدەنی لە پارێزگای سلێمانی ئێستا خۆیان لە پرۆژەی 'هەژماری من' تۆماركردووە و خۆتۆماركردنی مووچەخۆرانیش لە بانكی دڵخوازی خۆیان بەردەوامە.

وێنە گەورەكە: 'هەژماری من' یەكێكە لە پڕۆژە ستراتیژییەكانی كابینەی نۆی حكومەتی هەرێمی كوردستان و ئامانج لێی؛ كۆتاییهێنانە بە دابەشكردنی مووچە بەشێوەی كاش و بە دیجیتاڵیكردنی مووچەی فەرمانبەرانی هەرێمی كوردستان لەپێناو سوودمەندبوونیان لە خزمەتگوزارییە بانكییەكان و بەئاسان وەرگرتنی مووچەكانیان.

ئەوەی پێویستە بیزانیت: لەماوەی دوو ساڵی ڕاگەیاندنی پرۆژەی هەژماری من، نزیكەی یەك ملیۆن مووچەخۆر لە پڕۆژەكە تۆمار كراون و بۆ مووچەی مانگی حەوت زیاتر لە 500 هەزار مووچەخۆر مووچەكانیان بە دیجیتاڵی وەرگرت. بەپێی ئامارەکانیش، ڕێژەی تۆمارکردنی فەرمانبەران لە 'هەژماری من' لە هەولێر و دهۆک گەیشتووەتە %99، بەڵام ئەم ئامارە تەنها بۆ مووچەخۆرانی مەدەنییە.

زانیاریی بەدەستهاتوو: سەرچاوەیەك لە تیمی هەژماری من بە ئاڤا میدیای ڕاگەیاند، نزیكەی 90%ـی فەرمانبەرانی مەدەنی لە پارێزگای سلێمانی ئێستا خۆیان لە پرۆژەی هەژماری من تۆماركردووە و پرۆسەكەش بەردەوامە.

زانیاریی زیاتر: بەمەبەستی خێراتركردنی پرۆسەی پڕكردنەوەی فۆرمی 'هەژماری من' بۆ مووچەخۆرانی سنووری سلێمانی، سێ مانگ لەمەوبەر سێ تیمی دیكە زیادكران كە دووانیان بۆ بەڕێوەبەرایەتیی گشتیی پەروەردە و یەكێكیان بۆ زانكۆی پۆلیتەكنیكی سلێمانیە لەپاڵ 14 شوێنی دیكە لە بانكەكانی توی مەلیك، تانجەڕۆ، مەڵكەندی بە سەرجەم لقەكانیانەوە و دوو بەڕێوەبەرایەتیی گشتی و دوو شوێنی پۆلیتەكنیكی.

بۆچی گرنگە: دوای ڕاگەیاندنی پڕۆژەی 'هەژماری من' ژمارەی ئەو هاونیشتمانیانەی بوونەتە خاوەنی هەژماری بانکی، لە کەمتر لە 5%ـەوە بۆ زیاتر لە 15% بەرزبووەتەوە. 

- پڕۆژەکە بانکەکانی هانداوە بۆ فراوانکردنی خزمەتگوزاریی تاکەکەسی و زیادکردنی لق و تۆڕەکانی ئامێری ڕاکێشانی پارە و باشترکردنی خزمەتگوزاریی کڕیاران.

- ئیداعكردنی پارە لە بانکە بەشداربووەکانی هەژماری من، بەردەوام ڕوو لە زیادبوونە، کە بەم هۆیەوە، قەرزی تاکەکەسی و بازرگانی دەدرێت.

- تا ئێستا زیاتر لە سێ ملیار دۆلاری مووچەی مووچەخۆرانی هەرێم، لە ڕێگەی بانکە بەشداربووەکانەوە دراوە، ئەمەش هەلی کاری نوێی لە کەرتی خزمەتگوزارییە داراییەکاندا ڕەخساندووە و ڕێگەی بۆ دروستبوونی متمانەی بانکی خۆشکردووە.

- هەژماری من، پرۆسەی دابەشکردنی مووچەی حکومەتی هەرێمی کوردستانی ئاسانتر و خەرجکردنیشی خێراتر کردووە و ڕوونی و شەفافییەت لە دابینکردنی مووچەی حکومەتیشدا زیاتر بووە.