بەڕێوەبەری بازرگانی: پێش جەژنی ڕەمەزان بەشەخۆراکی مانگانە دابەش دەکرێت

ئاڤا نیوز

 

بەڕێوەبەری گشتیی بازرگانی هەرێمی کوردستان دەڵێت، زۆرینەی هاونیشتمانیان بەشە خۆراکی مانگی ڕەمەزانیان وەرگرتووە و بەشێکی کەم ماوە.

 

وێنە گەورەکە: بەشەخۆراکی مانگی ڕەمەزان لە 10 ماددە پێکدێت؛ بەهۆی ئەوەی بەشێکی بریکارەکانی خۆراک ماستەر کاردیان دروست نەکردووە تاوەکو نەیانتوانیوە ئەو پارەی وەریدەگرن بۆ وەزارەتی بازرگانیی عێراقی بنێرن.

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانیی هەرێمی کوردستان بە ئاڤا نیوزی ڕاگەیاند: "لە دهۆک %100 هاونیشتمانیان بەشەخۆراکی مانگانەیان وەرگرتووە، هەولێر %80 و سلێمانی %75".

 

زانیاریی زیاتر: بەپێی گوتەی ئەو بەڕێوەبەرە، هەموو ماددەکان هاتوون و لە کۆگاکاندان بەر لە جەژن سەرجەم هاونیشتمانیان بەشەخۆراک وەردەگرن، بەڵام پێش ئەوە دەبێت ئەو بریکارانەی ماون ماستەر کارد دروست بکەن.