شارەوانی هەولێر: لە بانگەشەی هەڵبژاردن سیمای شەقامەکانی هەولێر بپارێزن

ئاڤا نیوز

شارەوانی هەولێر هۆشداری بەلایەنەکان دەدات کە لە ئەگەری تێکدانی سیمای شار بە وێنە و پۆستەرەکانیان، ڕێکاری یاساییان لەبەرامبەر دەگیرێتە بەر.

چیرۆکی سەرەکی: دوو ڕۆژە بانگەشەی هەڵبژاردنی پەرلەمانی عێراق دەستیپێکردووە و لایەنەکان شەقام و شوێنە گشتییەکان بە وێنەی لیست و کاندیدەکانیان دادەپۆشن، شارەوانییەکانیش ڕێنمایی پەیوەست بە شوێن و شێوازی دانانی پۆستەری بانگەشە بڵاو دەکەنەوە.

لێدوانی فەرمی: کارزان عەبدولهادی، سەرۆکی شارەوانی هەولێر بە ئاڤای گوت، "نابێت بانگەشەی لایەنەکان ببێتە هۆی شێواندنی سیمای شار و تێکدانی سەوزایی دوورگە ناوەندیەکان،  لە ئەگەری سەرپێچی ڕێکاری یاساییان لە بەرامبەردا دەگیرێتەبەر بۆ هەر لایەنێک کە پابەندی ڕێنمایەکانی شارەوانی نەبێت."

ئەوەی پێویستە بیزانیت: هەڵبژاردنی پەرلەمانی عێراق بڕیارە لە ڕۆژی 2025-11-11 بکرێت، بانگەشەی هەڵبژاردن 37 ڕۆژ بەردەوام دەبێت، 21 ملیۆن و 404 هەزار و 291 کەس، مافی دەنگدانیان هەیە، حەوت هەزار و 768 کاندیدیش کێبڕکێ لەسەر 329 کورسییەکەی پەرلەمان دەکەن.