پارەی گەنمی جووتیارانی شێخان دابەش دەکرێت

ئاڤا نیوز

دوای گەیشتنی پارەی جووتیارانی سنووری دهۆک، پارەکە بە قۆناغ بەسەر هەر چوار سایلۆ دابەشکرا، سبەی جووتیارانی شێخان پارەکە وەردەگرن.

وێنە گەورەکە: پرۆسەی دابەشکردنی پارەی گەنمی جووتیارانی هەرێمی کوردستان بەردەوامە، پڕۆسەکە لە سنووری پارێزگای دهۆک بەردەوامە و ڕۆژانە نزیکەی 100 جووتیار پارەکە وەردەگرن. 

لێدوانی فەرمی: خالد بیبۆ، بەڕێوەبەری سایلۆی شێخان، بە ئاڤا میدیای ڕاگەیاند، سبەی یەکشەممە پارەی گەنمی جووتیارانی شێخان دابەش دەکرێت، ڕۆژانە جووتیاران چەکی بانکیان بۆ دەکرێت و لەبانک پارەکە وەردەگرن، وەکو قۆناغی یەکەم پارەکە بەو جووتیارانە دەدرێت کە لە یەک تۆن تاوەکو 50 تۆن گەنمیان ڕادەست کردووە، لەو ڕێژەیەش 372 جووتیاری شێخان ئەو پارەیە دەیانگرێتەوە.

زانیاریی زیاتر: بەڕێوەبەری سایلۆی شێخان، دەڵێت، ئەمساڵ 19 هەزار و 500 تۆن گەنم لەلایەن جووتیارانی شێخان ڕادەستی سایلۆ کراوە، بڕی پارەی جووتیارانی شێخان نزیکەی 16 ملیار دینارە، لەو بڕە پارەیەش وەکو قۆناغی یەکەم نزیکەی پێنج ملیار دینار هاتووە.

باکگراوند: حکومەتی عێراق بۆ ئەمساڵ بڕی 400 هەزار تۆن گەنمی جووتیارانی هەرێمی کوردستانی بە نرخی فەرمی کە 850 هەزار دینارە بۆ هەر تۆنێک وەرگرت.