ئاڤا هاونیشتمانیان لەبارەی بەکارهێنانی لەزگەی خەو ئاگادار دەکاتەوە

ئاڤا نیوز

لە کاتێکدا تۆڕە کۆمەڵایەتییەکان بوونەتە سەکۆیەکی بەرفراوان بۆ بازاڕکردن و ڕیکلامکردن، بەداخەوە هەندێک کەس و لایەن ئەم دەرفەتە دەقۆزنەوە بۆ فرۆشتنی بەرهەمی ساختە و قاچاخ کە زیانی تەندروستی گەورەیان هەیە. بەدواداچوونێکی ئاڤا، مەترسییەکی گەورەی لەسەر تەندروستی هاووڵاتییان ئاشکرا کردووە، بەتایبەت لە بارەی "لەزگەی خەو" و ڤیتامینە ساختەکانەوە.

ببینە و ببیستە: لە تۆڕی کۆمەڵایەتی تیکتۆک، ڕیکلامێکی بەربڵاو بۆ لەزگەیەک دەکرێت کە گوایە کێشەی بێخەوی چارەسەر دەکات. ڕیکلامکەران بانگەشەی ئەوە دەکەن کە بە دانانی ئەم لەزگەیە لەسەر قۆڵ، کەسەکە بە خێرایی خەوی لێدەکەوێت. بەڵام گەنجێک کە ئەم لەزگەیەی بەکارهێناوە، چیرۆکێکی جیاواز و دڵتەزێن دەگێڕێتەوە و دەڵێت "هیچ بنەمایەکی نییە، من نەمزانی خەڵەتام ئەو لەزگەم دا لە سکم، نە خەوم لێکەوت نە هیچ، گرێیەک لە سکم دروست بووە، دکتۆر وتوویەتی دەبێت بە نەشتەرگەری لایبەی."

لێدوانی فەرمی: بەرپرسانی وەزارەتی تەندروستییەوە بە ئاڤایان وت، ئەم بەرهەمانە بە قاچاخ دێنە ناو وڵات و هیچ بنەمایەکی زانستی و تەندروستییان نییە، بەڵکو هەمووی فرت و فێڵە. داواشیان لە هاووڵاتییان کردووە بە هیچ شێوەیەک بەم شتانە نەخەڵەتێن، چونکە جگە لە زیانی دارایی، زیانی گەورەی تەندروستییان پێدەگات.

ئەم لەزگانە زیاتر لە کەمالیات و دووکانی بەهارات و لەو جۆرە شوێنانەدا دەفرۆشرێن، نەک لە دەرمانخانەکان کە شوێنی گونجاوە بۆ فرۆشتنی بەرهەمی تەندروستی مۆڵەتپێدراو. لیژنەکانی پشکنین و بەدواداچوون لە وەزارەتی تەندروستی چەندین شوێنیان پشکنیوە و دەستیان بەسەر بڕێک لەم لەزگانەدا گرتووە.

لەلایەکی دیکەوە: دکتۆر ڕەسوول عەبدولخالق، بەڕێوەبەری پشکنین و بەدواداچوون لە وەزارەتی تەندروستی، بە ئاڤای وت، "ئەم بابەتە دوو خاڵی هەیە. یەکەم، بەشێکی دەرمانەکە قاچاخە و شتی وامان نەبیستووە بە لەزگەیەک خەوت لێ بکەوێ. ئەم بابەتەش هیچ لێکۆڵینەوە و پشکنینێکی نییە، بۆیە دەکرێت زیانی بۆ مرۆڤ هەبێت." تەنیا لە ماوەی یەک مانگدا، شەش کەس لەسەر فرۆشتنی ئەم جۆرە بابەتانە دراونەتە دادگا و بەشێکیان ئێستا لە زینداندان.

هەر لەو گەڕان و پشکنینانەدا، لیژنەکە دەستی بەسەر جۆرە ڤیتامینێکدا گرتووە کە دەبێت ستیکەری پێوە بێت و تەنیا لە نۆرینگەکان بفرۆشرێت بە ڕەچەتەی پزیشک، کەچی لە دووکانی بەهاراتەکاندا دەفرۆشرێت. دکتۆر ڕەسوول هۆشداری دا کە ئەگەر ئافرەتی دووگیان ئەم ڤیتامینە بەکاربهێنێت، ئەگەری لەبارچوونی منداڵەکەی هەیە.

داواکاری فەرمی: وەزارەتی تەندروستی داوا لە سەرجەم هاووڵاتییان دەکات وریابن و دوور بکەونەوە لە کڕینی ئەم جۆرە بەرهەمە ساختە و قاچاخانە کە لە ڕێگەی سۆشیال میدیا و شوێنی ناڕەسەنەوە ڕیکلامیان بۆ دەکرێت، چونکە ئەمە ڕاستەوخۆ تەندروستییان دەکاتە مەترسییەوە.