دهۆک ئامادەكاری بۆ جێبەجێكردنی بڕیارێكی سەرۆكوەزیران بارزانی دەكات

ئاڤا نیوز

شارەوانی دهۆک ڕایگەیاند، دوای بڕیارەکەی سەرۆکوەزیران بارزانی ئامادەکاریان دەستپێکردووە و چاوەڕێی ڕێنماییەکانی وەزارەتی شارەوانین.

لێدوانی فەرمی: دیار بەحری، سەرۆکی شارەوانی دهۆک لە کۆنگرەیەکی ڕۆژنامەوانیدا ڕایگەیاند: ڕۆژی سێشەممەی ڕابردوو لە کۆبوونەوەی سەرۆک شارەوانییەکان و وەزارەتی شارەوانیدا، لەلایەن وەزیرەوە هەموولایەک ڕاسپێردراوە بۆ ئەوەی ئامادەکاری بکەین بۆ ئەوەی بڕیارەکەی سەرۆکی حکومەت بەپەلە جێبەجێ بکرێت.

زانیاریی زیاتر: لەماوەیەکی نزیکدا لەلایەن وەزارەتی شارەوانییەوە ڕێنمایی و میکانزمی دابەشکردنی زەوییەکان دیاری دەکرێت، ئێمەش هەموو شارەوانییەکانی پارێزگای دهۆکمان ئاگادار کردووەتەوە، کە بەپێی ماستەرپلانەکانیان هەموو داتا و زانیارییەکمان بۆ بنێرن، بۆ ئەوەی لەگەڵ دەرچوونی ڕێنماییەکان ئێمە ئامادە بین بۆ جێبەجێکردنی بڕیارەکە.

ئەوەی پێویستە بیزانیت: پێشتر چواس عەبدولهادی، بەڕێوەبەری گشتیی نەخشەدانانی ئاوەدانی هەرێمی کوردستان لە وەزارەتی شارەوانی بە ئاڤا نیوزی ڕاگەیاندبوو: دوای تەواوکردنی لیستی ناوی فەرمابەرانی شایستە و تەواوبوونی ڕێکارەکان دەست بە دابەشکردنی زەوی بەسەر فەرمانبەرانی هەمیشەیی و گرێبەست دەکرێت. 

بۆچی گرنگە: دوای 18 ساڵ ڕاگرتنی دابەشکردنی زەوی بەسەر فەرمانبەران، بە بڕیاری سەرۆکوەزیران بارزانی پڕۆسەکە دەستپێدەکاتەوە، مەرجی سەرەکی ئەوەیە پێشتر فەرمانبەر لە وەرگرتنی زەوی و یەکەی نیشتەجێبوون سوودمەند نەبووبێت.