لە 48 کاتژمێری داهاتوو مووچەی مانگی هەشت دەگات و دەست بە دابەشکردنی دەکرێت

ئاڤا نیوز

بڕیارە سبەی یەکشەممە وەزارەتی دارایی عێراق دەست بە ڕێکارەکانی ناردنی مووچەی مانگی هەشت بکات، بەرپرسێکی باڵای حکومەتی عێراق ئاماژەی بەوەکردووە، گەر ڕێکارەکان بە خێرایی تەواو ببن، نووسراوی خەرجکردنی پارە هەر سبەی دەنێردرێت بۆ لقی هەولێری بانکی ناوەندی.

چیرۆکی سەرەکی: ڕۆژی پێنجشەممەی ڕابردوو، ئەنجوومەنی وەزیرانی عێراق وەزارەتی دارایی ڕاسپارد بە خەرجکردنی مووچەی مانگی هەشتی مووچەخۆرانی کوردستان، چاوەڕێ دەکرێت سبەی یەکشەممە وەزارەتی دارایی دەست بە ڕێکارەکانی ناردنی پارە بکات.

لێدوانی فەرمی: بەرپرسێکی باڵای حکومەتی عێراق بە ئاڤای ڕاگەیاند، ئەگەر سبەی یەکشەممە نووسراوەکە بگات، پارەکە دەخرێتە سەر هەژماری وەزارەتی دارایی کوردستان، بە پێچەوانەوە و ئەگەر کێشەیەک نەهاتە پێشەوە، نووسراوەکە ڕۆژی دووشەممە دەگات.

ئەمە لە کاتێکدایە کە دابەشکردنی مووچە لە سبەی یەکشەممەوە ئەستەمە، بەڵام گەر نووسراوەکە ڕۆژی دووشەممە زوو بگات، وەزارەتی دارایی کوردستان دەتوانێت بە کاش پارەکە وەربگرێت و لە هەمان ڕۆژدا خشتەی دابەشکردنی مووچە ڕابگەیەنێت. دواتر، ڕۆژی سێشەممە دەست بە دابەشکردنی مووچە دەکرێت.

لەلایەکی دیکەوە: سەبارەت بە هەژماری من، بڕیارە هەر دووشەممە خشتەی تایبەت بە خۆی بڵاوبکاتەوە و ئێوارەکەی پارە دەخرێتە سەر ئامێرەکانی ڕاکێشانی پارە (ATM)، بەمەش مووچەخۆران دەتوانن مووچەکانیان ڕابکێشن. بەڵام ئەمە بەندە بەوەی کە پارەکە ڕۆژی دووشەممە زوو بنێردرێت و وەزارەتی دارایی فریای ڕاکێشانی بکەوێت، ئەگەرنا پرۆسەی دابەشکردنی مووچە بۆ ڕۆژێک دوادەکەوێت.