نرخی بەنزینی بازرگانی ئاسایی دەبێتەوە

ئاڤا نیوز

نزیکەی 10 ڕۆژە بەهۆی کەمبوونەوەی بڕی بەنزین بەنرخی پاڵپشتیکراو بۆ بەنزینخانەکان و چاکسازیکردن لە یەکێک لە پاڵاوگەکان، هەر لیترێک بەنزینی بازرگانی 30 بۆ 60 دیناری چووەتەسەر، بڕیارە لەچەند ڕۆژی داهاتوودا دۆخەکە ئاسایی ببێتەوە.

وێنە گەورەکە: دوو پاڵاوگەی هەرێمی کوردستان نەوتی خام لە کێڵگەکانی نەوت وەردەگرن و بەنزین بە نرخی پاڵپشتیکراو بۆ پارێزگاکان دابین دەکەن، بەسەر بەنزینخانەکان دابەش دەکرێت لیتری بە 750 دینار بە شوفێران دەدرێت، هەروەها بەنزینی بازرگانیش بە بەنزینخانەکان دەفرۆشن.

لێدوانی فەرمی: سالار محەممەد، لێپرسراوی بەشی پشکنین لە بەڕێوەبەرایەتیی نەوت و کانزاکانی هەولێر بە ئاڤای گوت، پێدانی بەنزین بە نرخی پاڵپشتیکراو زیادکراوە، بەڵام بەهۆی چاکسازی لە یەکێک لە پاڵاوگەکان نرخی بەنزینی بازرگانی دانەبەزی، ئێستا چاکسازی تەواوبووە و لە چەند ڕۆژی داهاتوودا نرخەکە ئاسایی دەبێتەوە.

ئەوەی پێویستە بیزانیت: بەهۆی کەمبوونەوەی بەنزین، نرخی هەر لیترێک بەنزینی نۆرماڵی بازرگانی لە 875 دینار و 890 دینار بۆ 900 و 940 دینار بەرز بووەوە.