هێزەکانی پشتیوانیی خێرا هەزاران مەدەنی لە سوودان دەکوژن

ئاڤا نیوز

وڵاتانی ناوچەیی و نێودەوڵەتی، ڕێکخراوەکانی نەتەوەیەکگرتووەکان و ڕاپۆرتە ناوخۆییەکان "هێزەکانی پشتیوانی خێرا"ـیان تۆمەتبار کردووە بە ئەنجامدانی کوشتنی بە بەرنامەی هەزاران کەس بەکۆمەڵ کە دەگاتە ئاستی کۆمەڵکوژی لە شاری فاشەر لە سوودان.

چیرۆکی سەرەکی: هێزەکانی پشتیوانیی خێرا، تەواوی شاری فاشەر، پایتەختی ویلایەتی دارفۆری باکوور (ڕۆژئاوای سودان) کۆنترۆڵ کرد دوای زیاتر لە ساڵ و نیوێک لە گەمارۆدان. بەپێی ڕاپۆرتەکان، هێزەکانی پشتیوانی خێرا هەڵمەتێکی تیرۆریان لە شارەکەدا کردووە و کردەوەی دڕندەیی بێوێنەیان ئەنجامداوە، لەنێویاندا کوشتن تا ئاستی کۆمەڵکوژی دژی خەڵکی مەدەنی.

ڕاگەیێنراوی فەرمی: هێزی هاوبەشی هاوپەیمانی سوپای سوودان ڕایگەیاندووە، "هێزەکانی پشتیوانیی خێرا تاوانی دڕندانەیان دژی هاووڵاتیانی مەدەنیی بێتاوان لە شاری فاشەر ئەنجامداوە، تەنیا لە 26 و 27ـی ئەم مانگە زیاتر لە دوو هەزار هاووڵاتیی بێ چەک لەسێدارەدران و کوژران کە زۆربەیان ژن و منداڵ و بەساڵاچوو بوون".

زانیاریی زیاتر: گرتە ڤیدیۆیی "تۆقێنەر" لە ڕۆژانی ڕابردوو بە شێوەیەکی بەرفراوان لە پلاتفۆرمەکانی سۆشیال میدیادا بڵاوبوونەتەوە، "هێزەکانی پشتیوانیی خێرا" نیشان دەدەن هاووڵاتییانی مەدەنی و سەربازان گوللەباران دەکەن.

کاردانەوەکان: جێم ڕیچ، سەرۆکی لیژنەی پەیوەندییەکانی دەرەوەی ئەنجوومەنی پیرانی ئەمریکا داوا دەکات، هێزەکانی پشتیوانیی خێرا بخرێتە لیستی تیرۆرەوە و ڕایگەیاند: دڕندەییەکانی فاشەر ڕووداوێکی هەڕەمەکی نەبوون، بەڵکو لە سەرەتاوە بەشێک بوون لە پلانێکی بە بەرنامە لەلایەن هێزەکانی پشتیوانیی خێراوە داڕێژرابوو، ئەو هێزانە هەڵمەتێکی تیرۆرییان ئەنجامداوە و دڕندەیی بێ هاوتا ئەنجامداوە، لەوانەش کۆمەڵکوژی دژی گەلی سوودان".

یەکێتیی ئەورووپا "نیگەرانی قووڵی" خۆی لە پەرەسەندنی پێشێلکارییەکانی لە ڕۆژئاوای سوودان دەربڕی و داوای لە هەموو لایەنەکان کرد کە پەرەسەندنەکان ئارام بکەنەوە. ئاماژەی بەوەشکرد، زیاتر لە 18 مانگە دانیشتووانی فاشەر بەدەست گەمارۆیەکەوە دەناڵێنن کە هێزەکانی پشتیوانیی خێرا سەپاندوویانە، ئەوەش بووەتە هۆی کەمیی خۆراک و ئاو و چارەسەری پزیشکی، جگە لە بۆردومانی بەردەوام، ئەمەش ئازاری سەدان هەزار هاووڵاتیی مەدەنی لەو شارە زیاتر کردووە.

نەتەوەیەکگرتووەکان هۆشداریداوە لە "مەترسیی پەرەسەندنی پێشێلکاری و دڕندەیی بەهۆی پاڵنەری نەژادییەوە" هاوکات ئاماژەی بەوە کرد کە بە لەبەرچاوگرتنی ڕووداوەکانی ڕابردوو لە باکووری دارفۆر، مەترسی تووندوتیژی سێکسی، بەتایبەتی دژی ژنان و کچان، زۆر بەرزە.

لەلایەکی دیکەوە: ڕۆژی سێشەممە، سندووقی منداڵانی سەر بە نەتەوەیەکگرتووەکان (یونیسێف) هۆشداری دا کە دۆخەکە لە سەرانسەری ویلایەتی دارفۆر لە ڕۆژئاوای سوودان خراپە و ڕێژەی بەدخۆراکی و نەخۆشی بەرز بووەتەوە.