پارێزگای نەینەوا زۆرترین تووشبووی شێرپەنجەی لەسەر ئاستی عێراق هەیە

ئاڤا نیوز

ڕێژەی تووشبووانی شێرپەنجە لەسەر ئاستی عێراق؛ لە پارێزگای نەینەوا زۆرترین ڕێژەی شێرپەنجەی هەیە و لە هەرێمی کوردستانیش‌ لە پێوەری ئاساییی جیهانى كەمترە.

 

وێنە گەورەکە: پێشووتر پارێزگای بەسرە زۆرترین ڕێژەی تووشبووانی شێرپەنجەی تێدا بوو، بەڵام بە گوتەی ساڵح حەسناوی، وەزیری تەندروستی عێراق ئێستا ڕێژەکە لە پارێزگای نەینەوا بەرزترە، ئەمە لەکاتێکدایە لە شارەکانی هەرێمی کوردستان ڕێژه‌ى شێرپه‌نجه‌ ‌لە پێوەری ئاسایی جیهانى كەمترە.

 

لێدوانی فەرمی: ساڵح حەسناوی، وەزیری تەندروستی عێراق  لە میوانداریکردنی سەنتەری ئەلڕافیدەین بۆ گفتوگۆ گوتی: یاسای بیمەی تەندروستی پێویستی بە 8 بۆ 10 ساڵ هەیە بۆ ئەوەی هەموو عێراقییەکان بگرێتەوە، هاوکات پڕۆژە ستراتیژییە تەندروستییەکان درێژخایەنن و پێویستیان بە کات هەیە بۆ تەواوکردن و جێبەجێکردن.

 

لەلایەکی دیکەوە: بەپێی داتاکانی وەزارەتی تەندروستی لە هەرێمی کوردستان، ڕێژەى تووشبووانی نەخۆشیی شێرپەنجە لە پێوەرى جیهانی کەمترە، لە ساڵی 2023ـدا، له‌ 01ـی کانوونی دووەمەوە تاوەکو 30ـی حوزەیران ، ڕۆژانه‌ نزیكه‌ى 30 تاوەکو 35 نه‌خۆشى نوێ تۆمار كراون‌، بەمەش ژماره‌ى نه‌خۆشانى تۆمارکراوی شێرپه‌نجه لە شەش مانگدا‌، زیاتر له‌ 4 هەزار کەس بووە.

 

هۆکارە زانراوەکان: هۆشیاریی زیاتری خەڵکی کوردستان بۆ خۆپارێزی و پشکنین و پێشکەوتنی کەرتی تەندروستی لە چارەسەر و بەتەنگەوەچووندا، وای کردووە، هاووڵاتیانی زۆر پەنا بۆ پشکنین ببەن و زووتر چارەسەر وەرگرن.