لە عێراق دابەشکردنی مووچەی مانگی 11 دەستیپێکرد

ئاڤا نیوز

 

حکومەتی عێراق دەستی بە دابەشکردنی مووچەی مانگی 11ی فەرمانبەر و خانەنشینانی خۆی کرد و بانکەکانیش داوایان لە خانەنشینان کرد بۆ وەرگرتنی مووچەکانیان سەردانیان بکەن.

 وێنە گەورەکە: لە عێراق خانەنشینانی مەدەنی و سەربازی سەرەتای هەموو مانگێک وەک یەکەم توێژی فەرمانبەرانی دەوڵەت مووچەی ئەو مانگەیان وەردەگرن، واتە بۆ نموونە مووچەی مانگی 11 لە سەرەتای ئەم مانگەدا وەردەگرن.

ڕاگەیێنراوی فەرمی:  بانکی ڕەشید کە یەکێکە لە بانکە حکومییەکانی عێراق، لە ڕاگەیێنراوێکدا ئاماژەی بەوەشکردووە، ئەمڕۆ یەکشەممە، دەستیان بە دابەشکردنی مووچەی مانگی 11ی خانەنشینانی سەربازیی و مەدەنیی کردووە، بۆیە داوا لە هەموو خانەنشینان دەکات، سەردانی لقی بانکەکان و شوێنەکانی پارەدانی ئەلیکترۆنی لە بەغدا و پارێزگاکان بکەن بۆ وەرگرتنی مووچەکانیان.

گۆشەیەکی دیکەی دیمەنەکە: فەرمانبەران و خانەنشینانی هەرێمی کوردستان هاوشێوەی هاوپیشەکانیان لە عێراق، لەکاتی خۆیدا مووچەکانیان وەرناگرن، بەجۆرێک لەکاتێکدا لە عێراق دەست بە دابەشکردنی مووچەی مانگی 11 کراوە، بەڵام فەرمانبەران و خانەنشینانی هەرێمی کوردستان تائێستا مووچەی مانگی نۆیان وەرنەگرتووە.